BAKI, AzerVoice, Nailə Babazadə

Türkiyənin Nəqliyyat və İnfrastruktur naziri Abdulkadir Uraloğlu, tikintisi davam edən Bayburt-Gümüşhane Hava Limanının tamamlandıqdan sonra ölkənin 5-ci regional hava limanı kimi fəaliyyət göstərəcəyini açıqlayıb.

AzerVoice xəbər verir ki, nazir yazılı açıqlamasında bildirib ki, Gümüşhanəyə 67 kilometr, Bayburta isə 47 kilometr məsafədə, Köse–Bayburt avtomobil yolu üzərində inşa edilən hava limanının infrastruktur işləri tamamlanıb. Onun sözlərinə görə, 3 min metr uzunluğunda və 45 metr enində uçuş-enmə zolağı, 300x120 metr ölçülü perron və 265 metr uzunluğunda taksi yolu artıq hazırdır.

Üstyapı işlərinin də sürətlə davam etdiyini bildirən Uraloğlu qeyd edib ki, terminal binası, texniki blok və idarəetmə qülləsində, eləcə də mühəndis-kommunikasiya sistemlərində tikinti və quraşdırma işləri aparılır.

“Terminal binamız 17 min kvadratmetr sahəyə malik olacaq və müasir memarlıqla inşa ediləcək. Ümumi qapalı sahə 29 min kvadratmetrə çatacaq. Layihə tamamlandıqdan sonra hava limanı ildə 2 milyon sərnişin qəbul edə biləcək və Türkiyənin 5-ci regional hava limanı kimi fəaliyyət göstərəcək,” – deyə nazir Uraloğlu bildirib.