BAKI, AzerVoice
Milliyyətçi Hərəkat Partiyasının (MHP) sədri Devlet Bahçeli, Türkiyənin “Terrorsuz Türkiyə” yolunda əhəmiyyətli addımlar atdığını bildirərək, YPG/PYD-nin bu prosesi ləngitmək və pozmaq cəhdlərini kəskin şəkildə tənqid edib.
AzerVoice xəbər verir ki, o bu sözləri daxili və xarici hadisələrlə bağlı yazılı açıqlamasında qeyd edib.
Bahçeli, “YPG/PYD-nin prosesi pozmaq arzusu qəbul edilə bilməyəcək bir çirkəflikdir,” deyə vurğulayıb.
O, qeyd edib ki, Türkiyə heç bir təhdid və təzyiq qarşısında geri çəkilməyəcək, “istiqbal və istiklal hüququ”nun qorunması milli məsələ olaraq qəbul ediləcək.
Devlet Bahçeli əlavə edib ki, Türkiyə Cümhuriyyətinin yeni yüzilliyində barış və qardaşlıq şəraitində sosial inkişaf, milli birliyə nail olmaq və iqtisadi yüksəliş kimi hədəflərlə lider ölkələr sırasında yer alması gözlənilir. Onun sözlərinə görə, Türkiyənin varlığı əbədi, mövqeyi isə güclüdür.
Qeyd edək ki, iyulun 11-də İraqın Süleymaniyyə şəhərində PKK-ya bağlı bir qrup silahlarını məhv edərək prosesin yeni mərhələsini başladıb.
PKK üzvləri Süleymaniyyənin Surdaş mahalı sərhədindəki mağarada toplaşaraq silahlarını alovlu qazanda məhv ediblər. Proses İraq Kürd Regional Rəhbərliyi, Türkiyənin Milli Kəşfiyyat Təşkilatı, DEM Partiyası nümayəndələri və vətəndaş cəmiyyəti təmsilçilərinin iştirakı ilə izlənilib.
MHP sədri Devlet Bahçelinin çağırışı və Prezident Rəcəb Tayyib Ərdoğanın dəstəyi ilə irəliləyən "Terrorsuz Türkiyə" prosesi, silahların məhv edilməsi ilə simvolik dönüş nöqtəsinə çatıb. PKK-nın tam tərksilahı sentyabrın sonuna qədər tamamlanması planlaşdırılır.
Həmçinin qeyd edək ki, bu prosesin əsas mərhələlərinə DEM Partiyasının Ədliyyə Nazirliyinin icazəsi ilə İmralıya səfərləri, siyasi partiyalar arasında müzakirələr və prezident Ərdoğanın Pervin Buldan və Mithat Sancarla görüşləri daxildir. PKK mayın 5-7-də keçirilən qurultayında təşkilatın ləğvi və silahın yerə qoyulması qərarını açıqlamışdı.
"Terrordan Azad Türkiyə" hədəfinin həyata keçməsi ilə ölkə əhalisi üçün yeni bir dövr başlayır. Hökumət, prosesi sülh və təhlükəsizlik çərçivəsində davam etdirməkdə qərarlıdır.