UNIFIL Livanın cənubunda İsrailin Livan ordusuna qarşı həyata keçirdiyi hücumları “ağır pozuntu” kimi qiymətləndirib. Sülhməramlı qüvvələr həlak olan hərbçilərin ailələrinə başsağlığı verib və bu cür hücumların Livanın suverenliyinə, ərazi bütövlüyünə və BMT Təhlükəsizlik Şurasının 1701 saylı qətnaməsinə zidd olduğunu bildirib. 1701 saylı qətnamə 2006-cı ildə İsrail-Hizbullah müharibəsinin dayandırılması və 2024-cü ilin noyabrında əldə edilmiş atəşkəsin əsasıdır.

Livanın Baş naziri Nəvaf Salam ölkənin cənubunda üç hərbçinin ölümü ilə nəticələnən hücumu pisləyərək hadisəni Livanın suverenliyinə və xalqına qarşı yönəlmiş addım kimi dəyərləndirib. Baş nazir bəyanatında həlak olan briqada generalı Vissam Sabra, kapitan Eli Xuri və əsgər Hüseyn Qozalın ailələrinə başsağlığı verib. Mərcəyun rayonunda baş verdiyi bildirilən hadisə ilə bağlı araşdırmalar davam edir. Hadisə bölgədə onsuz da yüksək olan gərginliyi daha da artıran amillərdən biri kimi qiymətləndirilir.