ABŞ Prezidenti Donald Tramp administrasiyasının Venesuelaya qarşı hərbi müdaxiləsi və Venesuela Prezidenti Nikolas Maduronun saxlanılmasına etiraz məqsədilə Vaşinqtonda, Ağ Evin qarşısında nümayiş təşkil olunub. ABŞ-ın Venesuelaya hərbi müdaxiləsini pisləmək üçün toplaşan etirazçılar “Neft naminə qan tökülməsin”, “Bu müharibə qanunsuzdur”, “ABŞ, Latın Amerikasından əlini çək” və “Konqres, Trampın müharibəsini dayandır” şüarları yazılmış plakatlar qaldırıblar.

Papa XIV Leo bazar günü ABŞ əməliyyatı nəticəsində Prezident Nikolas Maduronun devrilməsindən sonra Venesuelada xalqın rifahının üstün tutulmalı olduğunu bildirib və ölkənin suverenliyinin təmin edilməsinə çağırıb.

OPEC+ ölkələri artan siyasi və geosiyasi qeyri-müəyyənliyə baxmayaraq, neft hasilatını sabit saxlamaq barədə prinsipial razılığa gəlib. Səkkiz əsas üzv — Səudiyyə Ərəbistanı, Rusiya, BƏƏ, Qazaxıstan, Küveyt, İraq, Əlcəzair və Oman dünya neftinin yarısını hasil edir. Qrup 2025-ci ilin aprel–dekabr aylarında hasilatı gündəlik 2,9 milyon barel artırsa da, noyabrda əlavə artımı dayandırmaq qərarına gəlib.

Rəsmilərin məlumatına görə, Venesuela Prezidenti Nikolas Maduronun işi ilə bağlı Manhetten Federal Məhkəməsində ilk dinləmənin bazar ertəsi keçirilməsi gözlənilir. ABŞ Ədliyyə Nazirliyinin açıqladığı ittihamnamədə Nikolas Maduro “korrupsiyalaşmış, qanunsuz hökumət” çərçivəsində genişmiqyaslı narkotik qaçaqmalçılığı əməliyyatlarını idarə etməkdə ittiham olunur və bu fəaliyyət nəticəsində ABŞ-a minlərlə ton kokain gətirildiyi bildirilir.

Çinin Xarici İşlər Nazirliyi bazar günü yaydığı bəyanatda ABŞ-ni Venesuela prezidenti Nikolas Maduro və onun həyat yoldaşını dərhal azad etməyə çağırıb, Venesueladakı böhranın isə dialoq və danışıqlar yolu ilə həll edilməli olduğunu bildirib. Nazirliyin rəsmi saytında dərc olunan açıqlamada vurğulanıb ki, ABŞ Maduronun və onun həyat yoldaşının təhlükəsizliyini təmin etməlidir. Bəyanatda onların saxlanılmasının beynəlxalq hüquq və beynəlxalq normaların açıq şəkildə pozulması olduğu qeyd edilib. Məlumatı “Reuters” agentliyi yayıb.

Venesuela Ali Məhkəməsi ölkənin icraçı vitse-prezidenti Delsi Rodriqesin dövlət başçısının səlahiyyətlərini müvəqqəti olaraq icra etməsi barədə qərar qəbul edib. Bu barədə Venesuela Ali Məhkəməsinin hakimi Tania D'Amelio “Venezolana de Televisión” televiziya kanalında çıxışı zamanı bildirib. Onun sözlərinə görə, Ali Məhkəmə Respublikanın icraçı vitse-prezidenti Delsi Rodriqesin Venesuela Konstitusiyası və qanunlarına ciddi şəkildə uyğun olaraq dərhal Respublika Prezidenti vəzifələrinin icrasına başlaması barədə göstəriş verib.

Birləşmiş Millətlər Təşkilatının Təhlükəsizlik Şurası ABŞ-ın Venesuelaya hücumu və prezident Nikolas Maduronun devrilməsi ilə əlaqədar yanvarın 5-də fövqəladə iclas keçirəcək.

Nikolas Maduro Venesuelanın yeganə qanuni prezidenti hesab olunur. Bunu Venesuelanın vitse-prezidenti Delsi Rodriqes açıqlayıb.

Maduro və həyat yoldaşı Nyu Yorkda ittiham aktından sonra cinayət məsuliyyətinə cəlb olunacaq. Bu barədə xarici KİV-lər məlumat yayıb. ABŞ baş prokuroru Pam Bondi bildirib ki, devrilmiş Venesuela lideri Nikolas Maduro və həyat yoldaşı Silia Flores Nyu Yorkda irəli sürülmüş ittiham aktından sonra cinayət məsuliyyətinə cəlb olunacaqlar. Bondi sosial şəbəkə hesabındakı paylaşımında vurğulayıb ki, bu cütlük tezliklə Amerika torpağında, Amerika məhkəmələrində Amerikanın ədalətinin bütün sərtliyi ilə üzləşəcək.

Avropa İttifaqı ABŞ qüvvələrinin Venesuela Prezidenti Nikolas Maduronun tutulması və ölkədən çıxarılması ilə nəticələnən genişmiqyaslı hərbi əməliyyatdan sonra sakitlik və beynəlxalq hüquqa hörmət olunmasına çağırıb. Aİ-nin xarici siyasət üzrə ali nümayəndəsi Kaja Kallas bildirib ki, blok uzun müddətdir Maduro hökumətinin legitimliyini tanımır və ölkədə sülh yolu ilə hakimiyyət dəyişməsini dəstəkləyir.

Belarus prezidenti Aleksandr Lukaşenko ABŞ-ın Venesuelaya qarşı həyata keçirdiyi hərbi əməliyyatları qəti şəkildə pisləyib. Eysmont bildirib ki, Lukaşenko ABŞ-ın hərbi təcavüz aktını qəbuledilməz hesab edir və bunun region üçün ciddi nəticələr doğura biləcəyini vurğulayıb. O, daha əvvəl ABŞ nümayəndələrinə açıqlayıb ki, ABŞ və Venesuela arasında hipotetik konflikt “ikinci Vyetnam” kimi fəsadlarla nəticələnə bilər.

"Yalnız indi Marko Rubio ilə telefon danışığını bitirdim. O mənə bildirdi ki, Nikolas Maduro ABŞ-ın hərbi qüvvələri tərəfindən cinayət ittihamları üzrə məhkəmə araşdırmasının aparılması üçün saxlanılıb və bu gün müşahidə etdiyimiz hərbi tədbirlər həbs orderini icra edənlərin qorunması üçün həyata keçirilib"- bu açıqlama ABŞ senatoru, respublikaçı Mayk Li tərəfindən paylaşılıb.