Sloveniya Qəzzaya yönələn “Global Sumud Flotilla” gəmisindəki fəallara İsrail tərəfindən göstərilən rəftarı sərt şəkildə pisləyib. Sloveniya Xarici İşlər naziri Tanya Fayon bildirib ki, heç bir ölkə insanları “işgəncə ilə qarşılamamalıdır”. O, həmçinin vurğulayıb ki, müharibədən ağır zərbə almış Qəzzadakı fələstinlilərin vəziyyətinə diqqət çəkməyə çalışan fəallara qarşı belə davranışın “demokratik cəmiyyətdə yeri yoxdur”.

İsrailin milli təhlükəsizlik naziri İtamar Ben Qvir Qəzzaya gedən flotiliya ilə bağlı saxlanılan fəalların əl bağlanmış və diz çökdürülmüş vəziyyətdə görüntülərini yayıb. Yayımlanan görüntülərdə saxlanılan şəxslərin hərbi gəminin göyərtəsində diz çökdürüldüyü, əllərinin arxadan bağlı olduğu və başlarının yerə əyildiyi görünür. Video “İsrailə xoş gəlmisiniz” yazısı ilə təqdim olunub.