BAKI, AzerVoice

Avropa İttifaqı Suriyaya qarşı sanksiyaların tamamilə ləğv edilməsi ilə bağlı razılığa gəlib.

AzerVoice xəbər verir ki, Fransanın “AFP” agentliyinin məlumatına əsasən, Avropa İttifaqı (Aİ) Suriyaya qarşı bütün iqtisadi sanksiyaların ləğvinə dair razılıq əldə edib.

Rəsmi açıqlamanın günün ikinci yarısında verilməsi gözlənilir.

Aİ-nin Xarici İşlər və Təhlükəsizlik Siyasəti üzrə Ali Nümayəndəsi Kaja Kallasın sədrliyi ilə keçiriləcək Xarici İşlər Nazirləri Şurasında sanksiyaların ləğvi rəsmiləşdirilə bilər. Kallas jurnalistlərə açıqlamasında qeyd edib ki, Avropa İttifaqı bu qərarla Suriyada sabitliyin təşviq olunmasını və Əfqanıstandakına bənzər ssenaridən yayınmağı hədəfləyir.

O bildirib ki, üzv ölkələr arasında məsələ ilə bağlı ciddi fikir ayrılıqları mövcuddur: “Hökumətin düzgün istiqamətdə addımlar atıb-atmadığı ilə bağlı narahatlıqlar var. Amma düşünürəm ki, ya rejimə ölkədə sabitlik yaratmaq imkanı veririk, ya da vermirik və bunun nəticələri ola bilər”.

Kallas ABŞ-ın Suriyaya qarşı sanksiyaları ləğv etməsini də müsbət addım kimi qiymətləndirib və Aİ-nin bu məsələdə lider mövqe tutduğunu vurğulayıb.

Qeyd edək ki, Avropa İttifaqı Suriyada 2011-ci ildə vətəndaş müharibəsi başlayandan sonra rejimə qarşı müxtəlif məhdudlaşdırıcı tədbirlər tətbiq etmişdi. Bunlara səyahət qadağaları, aktivlərin dondurulması, enerji, bankçılıq və nəqliyyat sektorlarına qarşı sektoral sanksiyalar daxil idi. Eyni zamanda, Suriya hökumətinə yaxın şəxslər də sanksiya siyahısına salınmışdı.

Bu ilin fevralında Aİ bəzi sanksiyaları dayandırmaq barədə qərar vermişdi. Bununla belə, Aİ rəsmiləri bildirirlər ki, bu qərarlar “geri dönə biləndir” və Suriyadakı vəziyyət davamlı şəkildə izlənilir.