BAKI,VOA,Yusif Şərifzadə

Formula 1 üzrə dünya çempionatının lideri Kimi Antonelli Belçikanın Spa-Frankorşam trasında keçirilən sıralama yürüşündə ən sürətli nəticəni göstərərək bazar günü baş tutacaq Belçika Qran-prisinə poul mövqeyindən start hüququ qazanıb.

VOA xəbər verir ki, Mercedes komandasının 19 yaşlı italiyalı pilotu sıralama mərhələsini birinci pillədə başa vurub. Red Bull komandasının pilotu Maks Ferstappen ikinci nəticəni göstərərək ön cərgədə Antonellinin yanında yer alacaq.

McLaren komandasının son dünya çempionu Lando Norris üçüncü ən yaxşı nəticəni göstərsə da, 10 yerlik start cəriməsi aldığı üçün geriyə düşəcək. Bunun nəticəsində Mercedes pilotu Corc Rassell ikinci start cərgəsinə yüksəlib, Ferrari sürücüsü Şarl Lekler isə dördüncü yerdən yarışa başlayacaq.

Bu mövsüm keçirilən 10 yarışın hamısında poul mövqeyi Mercedes komandasına məxsus olub. Antonelli bunlardan altısında ən sürətli pilot olaraq komandasına mühüm uğur qazandırıb.

Sıralama yürüşündən sonra danışan Antonelli poul mövqeyini qazanmasından məmnun olduğunu bildirib.

"Poul mövqeyində olmaq əladır. Sessiya heç də asan keçmədi, trasın vəziyyəti daim dəyişirdi. Sabah isə tamamilə başqa gündür. Yanımda Maks Ferstappen start alacaq, buna görə də yaxşı start götürmək və ilk döngələrdə önə keçmək çox vacib olacaq", – deyə italiyalı pilot bildirib.

Antonelli bu mövsüm indiyədək beş yarışın qalibi olub və çempionatın ümumi hesabında komanda yoldaşı Corc Rasselli 25 xal qabaqlayır. Son üç yarışın ikisində xal toplaya bilməyən italiyalı pilot Spa-Francorchamps yarışında üstünlüyünü daha da artırmağa çalışacaq.