BAKI,AzerVoice, Fərid Mikayılov

Fənərbaxça Klubunun prezidenti Sadettin Saran dünya futbolunun tanınmış ulduzlarından olan Enqolo Kantenin transferinin uğurla yekunlaşması münasibətilə Rəcəb Tayyib Ərdoğana təşəkkür edib.

AzerVoice xəbər verir ki, Saran bununla bağlı yaydığı açıqlamada Kante transferinin həm Fənərbaxça, həm də ümumilikdə Türk futbolu üçün mühüm əhəmiyyət daşıdığını bildirib.

Klub prezidenti qeyd edib ki, bu prosesin müsbət nəticələnməsində Ərdoğanın verdiyi dəstək xüsusi rol oynayıb.

Saran vurğulayıb ki, dünya səviyyəli futbolçunun transferi Fənərbaxçanın beynəlxalq nüfuzunun artmasına, eləcə də Türkiyə futbolunun rəqabət qabiliyyətinin güclənməsinə xidmət edəcək.

Klub rəhbəri açıqlamasında Fənərbaxça azarkeşlərinin transfer prosesi boyunca göstərdiyi dəstəyə də toxunaraq bildirib ki, azarkeşlərin inamı və birliyi klub üçün ən böyük motivasiya mənbəyidir. Onun sözlərinə görə, bu birlik bundan sonrakı mərhələdə meydanda da öz nəticəsini göstərəcək.

Sadettin Saran sonda qeyd edib ki, məqsəd Fənərbaxçanı həm ölkə daxilində, həm də beynəlxalq arenada yeni uğurlara daşımaqdır və bu yolda klub rəhbərliyi, futbolçular və azarkeşlər birlikdə mübarizə aparacaq.

Qeyd edək ki, fransalı yarımmüdafiəçi Fənərbaxçaya transfer olunmazdan əvvəl Səudiyyə Ərəbistanının Əl-İttihad komandasında çıxış edib və həm klub, həm də milli səviyyədə mühüm uğurlara imza atıb.

Eyni zamanda xatırladaq ki, Türkiyə prezidenti Rəcəb Tayyib Ərdoğan, Səudiyyə Ərəbistanına rəsmi səfər edib və paytaxt Ər-Riyadda Krallığın vəliəhdi, Baş nazir Məhəmməd bin Salman ilə görüş keçirib. Görüş zamanı Türkiyə–Səudiyyə Ərəbistanı münasibətləri, iqtisadi əməkdaşlıq və regional məsələlər müzakirə olunub.