BAKI, AzerVoice
Türkiyə Milli Futbol Komandasının baş məşqçisi Vinçenzo Montella ilə yeni müqavilə imzalanacaq.
AzerVoice xəbər verir ki, bu barədə Türkiyə Futbol Federasiyası (TFF) rəsmi açıqlama yayıb.
TFF-dən verilən məlumata görə, 2023-cü ilin sentyabr ayından bu yana milli komandanın başında olan italyan çalışdırıcının müqaviləsinin yenilənməsi ilə bağlı 30 iyun – bazar ertəsi günü rəsmi imza mərasimi keçiriləcək.
Tədbirin İstanbulda yerləşən Hasan Doğan Milli Komandalar Düşərgə və Təlim Mərkəzində baş tutacağı bildirilib.
Montella rəhbərliyi altında Türkiyə milli komandası UEFA Avro-2024 turnirinə vəsiqə qazanıb və turnirdə uğurlu çıxışı ilə diqqət çəkib. Yeni müqavilənin detalları imza mərasimindən sonra ictimaiyyətə təqdim ediləcək.