BAKI, VOA, Orxan Qədirzadə

Azərbaycan Respublikasının Gənclər Fondunun dəstəyi, Azərbaycan Respublikası Gənclər Təşkilatları Milli Şurası və “Gənclərin Maarifləndirilməsinə Dəstək” İctimai Birliyinin təşkilatçılığı ilə “Xocalı şahidləri ilə görüş” adlı anım və maarifləndirici tədbir keçirildi.

VOA Gənclər Fonduna istinadən xəbər verir ki, tədbir çərçivəsində Xocalı faciəsinin canlı şahidləri – Novruzova Ayna, Tahirə Hüseynova və Arzu Musayeva iştirakçılarla görüşərək həmin gecəyə dair xatirələrini bölüşdülər.

Görüş zamanı şahidlər yaşadıqları hadisələri ətraflı şəkildə nəql edərək faciənin insan talelərində buraxdığı dərin izlərdən danışdılar. Onların çıxışları gənclər tərəfindən böyük diqqət və həssaslıqla qarşılandı. İnteraktiv müzakirə formatında davam edən proqram çərçivəsində iştirakçıların sualları cavablandırıldı, tarixi həqiqətlərin gələcək nəsillərə ötürülməsinin vacibliyi vurğulandı.

Tədbirin əsas məqsədi Xocalı faciəsi ilə bağlı həqiqətlərin canlı şahidlərin dili ilə ictimaiyyətə çatdırılması, milli yaddaşın qorunması və gənc nəslin tarixi şüurunun möhkəmləndirilməsi olub. Çıxışlarda bildirildi ki, Xocalı yalnız keçmişin faciəsi deyil, həm də ədalət və həqiqət uğrunda davam edən mübarizənin simvoludur.