Səudiyyə Ərəbistanı Kulinariya Sənəti Komissiyası "Dad Qövsü" ("Ark of Taste") adlı qlobal təşəbbüs çərçivəsində təqdim olunan 180 Səudiyyə məhsulu sırasında Mədinə bölgəsinə aid 35 məhsulu rəsmi şəkildə sənədləşdirib.

"Slow Food" Fondu tərəfindən təsis edilmiş bu onlayn reyestr tarixi ərzaq və kulinariya məhsullarını qoruyur, yerli istehsalçıları dəstəkləyir, eləcə də gələcək nəsillər naminə biomüxtəlifliyi və ənənəvi kulinariya mədəniyyətini təbliğ edir.

Siyahıya daxil edilmiş məhsullar Mədinə bölgəsində zəngin olan yerli qida inqrediyentlərinin müxtəlifliyini, habelə regionun tarixi, mədəniyyəti və nəsildən-nəslə ötürülən mətbəx ənənələri ilə sıx bağlı olan fərqli kənd təsərrüfatı və qida nemətlərini tam şəkildə əks etdirir.##

Həmin siyahıya bölgənin kulinariya və mədəni irsini təmsil edən digər məhsullarla yanaşı Əl-Ays buğdası, Əl-Ays Bərni xurması, Həsəvi nanəsi, Əl-Fiqra dağ balı, Mədinə humusu, şürək çörəyi, balzam bitkisi, Mədinə kələmi və Mədinə innabı daxildir.

Bu məhsulların beynəlxalq siyahıya daxil edilməsi yerli kulinariya ənənələrini təşviq etmək, onların mədəni və iqtisadi dəyərini ön plana çıxarmaq, yerli istehsalçılara hərtərəfli dəstək vermək məqsədi daşıyır.

Bu addım eyni zamanda qida irsi və biomüxtəlifliyə həsr olunmuş beynəlxalq platformalarda və qlobal təşəbbüslərdə Səudiyyə Ərəbistanı məhsullarının iştirakını və mövqeyini daha da gücləndirir.

Təşəbbüs ənənəvi qida məhsullarının qorunmasının, onların istehsalı ilə bağlı toplanmış bilik, təcrübə və vərdişlərin yaşadılmasının zəruriliyi barədə ictimai məlumatlılığı artırır, bununla da həmin nemətlərin davamlılığını möhkəmləndirir və onların gələcək nəsillərə ötürülməsinə birbaşa kömək göstərir.

Mədinə məhsullarının bu qlobal reyestrdə yer alması bölgənin ənənəvi kənd təsərrüfatı və ərzaq məhsulları baxımından nə dərəcədə zəngin olduğunu nümayiş etdirir və onların Səudiyyə Ərəbistanının ümumi kulinariya irsinin mühüm bir hissəsi kimi mövcudluğunu daha da möhkəmləndirir.