Səudiyyə Ərəbistanı ABŞ-nin Nyu-York şəhərində keçirilən məşhur “Fancy Food Show” qida sərgisində fəxri qonaq qismində iştirak edir. Krallıq sərgi çərçivəsində özünün ən keyfiyyətli kənd təsərrüfatı məhsullarını, xüsusilə ölkənin vizit kartı sayılan unikal xurma növlərini beynəlxalq auditoriyaya nümayiş etdirir.

ArabAZ xəbər verir ki, sərgidə xarici investorların və qida ekspertlərinin böyük marağına səbəb olan 6 ən məşhur Səudiyyə xurması təqdim olunub. Onların arasında Mədinədə yetişdirilən, tünd rəngli və xəfif şirinliyi ilə Krallığın ən qiymətlisi sayılan “Acva” xurması ön plana çıxır. Əl-Qasım bölgəsinin qızılı rəngli, karamel dadını xatırladan və “xurmaların kraliçası” adlandırılan “Sukkari” növü də ziyarətçilərə təklif edilir.

Bununla yanaşı, Səudiyyənin milli qəhvəsinin yanında unudulmaz dad yaradan yumşaq teksturlu “Xalas”, qızılı və qəhvəyi rənglərin sintezindən ibarət bal dadlı “Saqai”, saqqızvari quruluşu ilə gündəlik qidalanmada üstünlük verilən “Xudri” və həm təzə, həm də qurudulmuş formada yeyilən tünd rəngli “Səfavi” növləri sərginin ən çox dadılan məhsulları sırasındadır.

Krallıq bu cür nüfuzlu beynəlxalq platformalarda iştirak etməklə öz milli mətbəx mədəniyyətini tanıtmağı və qeyri-neft sektorunun ixrac potensialını daha da gücləndirməyi hədəfləyir