Bakı.VOA:
Azərbaycan və Ermənistan arasında münasibətlərin normallaşması istiqamətində atılmış ilk addımlar artıq indidən regional əlaqəliliyin yaxşılaşmasına gətirib çıxarıb.
VOA xəbər verir ki, bu barədə "S&P Global Ratings" hesabatında qeyd olunub.
20 fevral 2026-cı ildə “S&P Global Ratings” Ermənistan üzrə proqnozunu yenidən nəzərdən keçirərək onun reytinqini “stabil”dən “müsbət”ə dəyişib.
Proqnozun “müsbət”ə dəyişdirilməsi reytinq agentliyinin regionda geosiyasi və təhlükəsizlik dinamikasının yaxşılaşması potensialının mövcudluğu barədə rəyini əks etdirir. Xüsusilə, Ermənistan və Azərbaycan arasında diplomatik və ticarət münasibətlərinin normallaşdırılmasının daha da irəliləməsi gözlənilir.
“Ermənistan və Azərbaycan arasında münasibətlərin normallaşdırılması istiqamətində səylər gələcək hərbi eskalasiya ehtimalını azalda və regional təhlükəsizlik risklərini zəiflədə bilər. Azərbaycanla danışıqlarda əldə olunan irəliləyiş qısamüddətli təhlükəsizlik risklərini azalda bilər. Bununla belə davamlı sülh sazişinin perspektivi hüquqi baxımdan icrası məcburi sənədin imzalanmasından və onun effektiv icrasından asılı olaraq qalır. İki ölkə arasında danışıqlar qarşılıqlı suverenliyin və ərazi bütövlüyünün tanınmasına, sərhədlərin delimitasiyasına və diplomatik münasibətlərin qurulmasına əsaslanan hərtərəfli sülh çərçivəsinə yönəlib”,- deyə hesabatda qeyd olunur.
“S&P Global Ratings” analitikləri vurğulayırlar ki, 2025-ci ilin avqustunda ABŞ-nin vasitəçiliyi ilə əldə olunmuş razılaşma mühüm siyasi mərhələ olub. Bu razılaşma rəhbərlik səviyyəsində öhdəliklərə sadiqliyin nümayişi kimi qiymətləndirilir və təhlükəsizlik sahəsində vəziyyətin sabitləşməsinə töhfə verib.
“Normallaşma istiqamətində atılan ilk addımlar artıq regional əlaqəlilik və ticarətdə mülayim yaxşılaşmaya gətirib çıxarıb. Bu proses Ermənistan ilə Türkiyə arasında sərhədlərin açılması və diplomatik münasibətlərin qurulmasına yönəlmiş normallaşma prosesi ilə paralel şəkildə davam edir. Bizim baza ssenarimiz iyun seçkilərindən sonra geniş siyasi davamlılığın qorunacağını nəzərdə tutur: yeni hökumət Azərbaycanla tamdəyərli sülh sazişinin əldə olunması kursunu davam etdirəcək”- deyə hesabatda qeyd olunur.
Xatırladaq ki, avqustun 8-də Azərbaycan Respublikasının Prezidenti İlham Əliyev, Amerika Birləşmiş Ştatlarının Prezidenti Donald Tramp və Ermənistan Respublikasının Baş naziri Nikol Paşinyan Azərbaycan Respublikasının Prezidenti və Ermənistan Respublikasının Baş nazirinin Vaşinqtonda görüşünə dair Birgə Bəyannamə imzalayıblar.
Həmin gün Vaşinqtonda Azərbaycan Respublikasının Prezidenti İlham Əliyevin Amerika Birləşmiş Ştatlarının Prezidenti Donald Tramp və Ermənistan Respublikasının Baş naziri Nikol Paşinyanla görüşü çərçivəsində Azərbaycan Respublikasının xarici işlər naziri Ceyhun Bayramov və Ermənistan Respublikasının xarici işlər naziri Ararat Mirzoyan “Azərbaycan Respublikası və Ermənistan Respublikası arasında sülhün və dövlətlərarası münasibətlərin təsis edilməsinə dair Saziş” layihəsini paraflayıblar.
Azərbaycan Respublikası və Ermənistan Respublikası xarici işlər nazirlərinin ATƏT-in fəaliyyətdə olan sədrinə ATƏT-in Minsk Prosesinin, ATƏT-in fəaliyyətdə olan sədrinin Minsk konfransının müzakirəsində olan münaqişə üzrə şəxsi nümayəndəsi və Yüksək Səviyyəli Planlaşdırma Qrupunun bağlanması barədə birgə müraciət ünvanlayıblar.