BAKI, AzerVoice
İsrail ordusu hazırda Fələstinin Qəzza zolağının ümumi ərazisinin 77 faizinə nəzarət edir.
AzerVoice xəbər verir ki, bu barədə Qəzza hökumətinin mətbuat xidməti məlumat yayıb.
“İsrail ordusu Qəzza zolağının ümumi ərazisinin 77 faizini ya birbaşa quru işğalı və mülki yaşayış məntəqələrində qoşun yerləşdirməklə, ya da fələstinlilərin evlərinə, torpaqlarına və mülklərinə qayıtmasına imkan verməyən intensiv atəşi ilə, yaxud zorakı məcburi köçürmə siyasəti vasitəsilə nəzarət altına alıb. Bu, on minlərlə dinc sakini bombardman, qətl və kütləvi qırğın təhlükəsi altında dəfələrlə qaçmağa məcbur edir” - deyə məlumatda bildirilib.
Qəzza hakimiyyəti bu cür məcburi nəzarət formasının beynəlxalq humanitar hüququn kobud şəkildə pozulması olduğunu vurğulayıb. Bildirilib ki, anklavda baş verən cinayətlərə görə hüquqi məsuliyyət təkcə İsrailin deyil, həm də ABŞ, Böyük Britaniya, Almaniya və Fransanın üzərinə düşür.