Böyük Britaniyanın Baş naziri Kir Starmer “Mançester Yunayted” klubunun ortaq sahibi Cim Retkliffin miqrasiya ilə bağlı səsləndirdiyi fikirləri kəskin tənqid edib və ondan üzr istəməyi tələb edib. 2020-ci ildən Monakoda yaşayan milyarder ölkədə sosial müavinət alanların sayının və miqrasiyanın yüksək olduğunu bildirib.

İranın xarici işlər naziri Abbas Əraqçi ABŞ prezidenti Donald Trampın İranın raket proqramı ilə bağlı açıqlamalarına sərt reaksiya verib. İran dövlət televiziyasının məlumatına görə, Əraqçi İran İslam İnqilabının 47-ci ildönümü münasibətilə Tehranda keçirilən yürüşdə ABŞ-la danışıqlara dair açıqlama verib. Nazir bildirib ki, heç kim İranın raket proqramına müdaxilə edə bilməz. “Raketlərimiz müzakirə mövzusu deyil və olmayacaq”, – deyə o vurğulayıb.

İran prezidenti Məsud Pezeşkian ABŞ-la danışıqlar fonunda Türkiyənin “konstruktiv rolu”nu vurğulayaraq Rəcəb Tayyib Ərdoğan və xarici işlər naziri Hakan Fidana təşəkkür edib. Dövlət televiziyasının məlumatına görə Pezeşkian İran İslam İnqilabının 47-ci ildönümü münasibətilə Tehrandakı Azadi meydanında çıxış edib. Pezeşkian çıxışında Azərbaycan, Qətər, Birləşmiş Ərəb Əmirlikləri, Pakistan, Səudiyyə Ərəbistanı və Misirin də “problemlərin diplomatiya yolu ilə həllinə” töhfə verməyə çalışdığını qeyd edib. O, İranın nüvə silahı istehsal etməyə çalışmadığını bildirib, ABŞ və Avropadan gələn bəyanatların “etimadsızlıq divarı” yaratdığını və bu səbəbdən danışıqların nəticə vermədiyini deyib.

BMT-nin İnsan Hüquqları üzrə Ali Komissarlığının sözçüsü Ravina Şamdasani İsrailin işğal altındakı Qərb Sahilində atdığı addımların qanunsuz ilhaqı gücləndirdiyini və bunun beynəlxalq hüquqa zidd olduğunu bildirib. Şamdasani Anadolu Agentliyinin suallarına yazılı cavabında İsrailin Fələstin administrasiyasının nəzarətində olan ərazilərdə nəzarət tədbirlərini artırmaq qərarını qınayıb. Onun sözlərinə görə, bu addımlar rəsmi deportasiya olmadan təzyiq yolu ilə məcburi köçürməni asanlaşdıran şərait yaradır.

İndoneziyanın Yava adasının şərqində yerləşən Semeru vulkanı beş dəfə püskürərək 1000 metr hündürlüyədək kül tullayıb.

UNICEF-in icraçı direktoru Ketrin Rassel dünyadakı münaqişələr, iqlim şokları, iqtisadi qeyri-sabitlik və bərabərsizliyin uşaqlar üzərində böyük təzyiq yaratdığını bildirib. O, 2026-cı ildə 130-dan çox ölkədə 200 milyondan çox uşağın humanitar yardıma ehtiyacı olacağını vurğulayıb. Rasselin sözlərinə görə, uşaqların qarşılaşdığı çətinliklər getdikcə daha mürəkkəb və qütbləşmiş xarakter alır.

İndoneziya Qəzza zolağı kimi münaqişə zonalarında yerləşdirilmək üçün 5 min ilə 8 min arasında şəxsi heyətin hazırlanmasına başladığını rəsmən elan edib. İndoneziya Milli Silahlı Qüvvələrinin (TNI) komandanı general Maruli Simancuntak bildirib ki, hərbçilərin hazırlıq prosesi artıq start götürüb. Komandanın sözlərinə görə, göndəriləcək əsgərlərin dəqiq sayı və missiyaya başlayacağı tarix hələlik tam dəqiqləşməsə də, hazırlıqlar briqada səviyyəsində (təxminən 5-8 min nəfər) davam etdirilir.

İran Xarici İşlər Nazirliyinin sözçüsü İsmayıl Bəqayi, region ölkələrinin danışıqlar prosesindəki xoşniyyətli yanaşmalarını yüksək qiymətləndirdiklərini bildirib. Həftəlik mətbuat konfransında çıxış edən Bəqayi, İranın danışıqlar masasında "zaman qazanmaq" niyyəti güdməsi ilə bağlı tənqidlərə cavab verən Bəqayi, bu iddiaların əsassız olduğunu bildirib.

Pakistanın paytaxtı İslamabadda, 6 fevral tarixində cümə namazı zamanı şiə icmasına məxsus İmam Bargah məscidində törədilən terror aktı nəticəsində həyatını itirənlərin sayı 38-ə çatıb. Pakistan Tibb Elmləri İnstitutu (PIMS) və digər xəstəxanalardan alınan məlumatlara görə, partlayışdan sonra ağır yaralı halda müalicə alan bəzi şəxslərin vəfat etməsi itkilərin sayını artırıb. Tibbi rəsmilər bir çox yaralının vəziyyətinin hələ də kritik olduğunu və ölü sayının daha da arta biləcəyini qeyd ediblər.

ABŞ Prezidenti Donald Tramp özünün ən mübahisəli iqtisadi bəyanatlarından birini verərək, Federal Ehtiyat Sisteminin (FED) sədri vəzifəsinə yeni namizədi Kevin Vorş üçün hədəf limitini olduqca yüksək müəyyənləşdirib. Tramp Vorşun ABŞ iqtisadiyyatını 15 faizlik tarixi artım tempinə çatdırmağa qadir olduğunu vurğulayıb. Bu açıqlama həm Vorş üzərində böyük təzyiq yaradır, həm də Trampın Vaşinqtonda onilliklərdir tətbiq olunan pul-kredit ənənələrini sındırmaq üçün apardığı mübarizənin rəsmi elanıdır.

Ağ Ev rəsmisi bazar ertəsi günü ABŞ Prezidenti Donald Trampın İsrailin İordan çayının qərb sahilini ilhaq etməsinə qarşı olduğunu bir daha təsdiqləyib. ABŞ rəsmisi bildirib ki, “İordan çayının qərb sahilindəki sabitlik İsrailin təhlükəsizliyini qoruyur və administrasiyanın regionda sülhə nail olmaq məqsədinə uyğundur”.

Böyük Britaniya Kralı III Çarlz, qardaşı Şahzadə Endryunun cinsi cinayətlərdə ittiham olunan Ceffri Epşteyna gizli məlumatlar ötürdüyü iddiaları ilə bağlı polis araşdırmasına dəstək verməyə hazır olduğunu bildirib. İddialar, ABŞ Ədliyyə Nazirliyinin yayımladığı yeni Epşteyn sənədlərinin ardından yenidən gündəmə gəlib. ABŞ-da yayımlanan son dosyelərə görə, Şahzadə Endryunun 2010-cu ildə Epşteyna bəzi "gizli" materiallar göndərdiyi irəli sürülür.