NATO Baş katibinin müavini Radmila Şekerinska bildirib ki, bütün kəşfiyyat hesabatları və siyasi təhlillər müharibə başa çatdıqdan sonra Rusiyanın daha da təhlükəli hala gələcəyini göstərir. Şekerinska Almaniyada keçirilən 62-ci Münhen Təhlükəsizlik Konfransında “Avropalılar, birləşin. Daha çətin dünyada yenidən söz sahibi olmaq” adlı paneldə çıxış edib.

Afrika İttifaqı Komissiyasının sədri Mahmud Əli Yusif şənbə günü təşkilatın Efiopiyanın paytaxtı Əddis-Əbəbədə keçirilən 39-cu sammitinin açılışında Fələstin xalqının "məhv edilməsinə" son qoyulmalı olduğunu bildirib. Afrika İttifaqı Komissiyasının sədri Mahmud Əli Yusif şənbə günü təşkilatın Efiopiyanın paytaxtı Əddis-Əbəbədə keçirilən 39-cu sammitinin açılışında Fələstin xalqının "məhv edilməsinə" son qoyulmalı olduğunu bildirib.

ABŞ Cənub Komandanlığı (SOUTHCOM), Karib dənizində narkotik daşıdığı iddia edilən qayığın vurulduğunu və nəticədə 3 nəfərin öldüyünü açıqlayıb. SOUTHCOM-un sosial media platforması vasitəsilə yaydığı rəsmi bəyanatda bildirilir ki, narkotik qaçaqmalçılığı ilə məşğul olduğu iddia edilən hədəfə qarşı zərbə endirilib. Komandanlıq, kəşfiyyat məlumatlarının həmin gəminin birbaşa narkotik ticarəti fəaliyyətlərində iştirak etdiyini təsdiqlədiyini müdafiə edib və hücum anının görüntülərini paylaşıb.

Çin Xarici İşlər naziri Van İ Münhen Təhlükəsizlik Konfransı çərçivəsində Fransa, Almaniya və Britaniyalı həmkarları ilə görüşərək Pekini etibarlı tərəfdaş kimi təqdim edib. Nazir vurğulayıb ki, Çinin inkişafı Avropa üçün təhdid deyil, əksinə bir fürsətdir və tərəflər rəqib yox, tərəfdaş kimi hərəkət etməlidir. Görüşlər Avropa İttifaqının Çindən strateji asılılığı azaltmaq cəhdləri və elektrikli avtomobil ixracı ilə bağlı yaranan rüsum mübahisələri fonunda baş tutub. Van İ Avropanı "rasional və praqmatik" siyasət yürütməyə çağıraraq, birtərəfli addımların və proteksionizmin qlobal sabitliyə zərər verdiyini bildirib. O, iqtisadi əlaqələri "təməl daşı" adlandırıb və qarşılıqlı asılılığın təhlükəsizliyə risk yaratmadığını qeyd edib.

ABŞ Prezidenti Donald Trump seçici şəxsiyyətinin təsdiqi ilə bağlı tələbin Konqresdən keçməsə belə aralıq seçkilərdə tətbiq ediləcəyini və bu məsələ ilə bağlı prezident sərəncamı imzalayacağını bildirib. O, Truth Social hesabında paylaşım edərək Demokratların seçici şəxsiyyəti məsələsində səs verməkdən imtina etdiyini qeyd edib və onların seçkilərdə saxtakarlıq etmək istədiklərini iddia edib. Tramp vurğulayıb ki, Konqres tərəfindən təsdiqlənib-təsdiqlənməməsindən asılı olmayaraq, aralıq seçkilərdə seçici şəxsiyyəti tələbi qüvvədə olacaq. O, həmçinin yaxın zamanda bununla bağlı rəsmi prezident sərəncamı imzalayacağını açıqlayıb.

Danışıqlar real yanaşma əsasında və həddindən artıq tələblərdən uzaq şəkildə aparılarsa, müsbət istiqamətdə irəliləyə bilər. Bu barədə Şəmxani “Al Jazeera” telekanalına açıqlamasında qeyd edib. İran Müdafiə Şurasının katibi və İranın ali rəhbəri Əli Xameneinin müşaviri Əli Şəmxani Omanda keçirilən İran-ABŞ danışıqlarına münasibət bildirib.

BMT ciddi maliyyə çətinliyi ilə üzləşə biləcəyi barədə xəbərdarlıq edib. Təşkilat bildirib ki, xüsusilə ABŞ başda olmaqla bəzi ölkələrin üzvlük haqlarını ödəməməsi səbəbindən iyul ayına qədər maliyyə ehtiyatları tamamilə tükənə bilər. BMT baş katibi Antonio Quterreş üzv dövlətlərə göndərdiyi məktubda 2025-ci ilin rekord səviyyədə ödənilməmiş borcla başa çatdığını qeyd edib. Onun sözlərinə görə, böhran proqramların icrasını təhlükə altına salır və yaxın aylarda vəziyyət daha da ağırlaşa bilər.

New York Times və digər mənbələr ABŞ-ın Karib hövzəsində yerləşən U.S.S. Gerald R. Ford təyyarədaşıyan zərbə qrupunu Yaxın Şərqə göndərmək qərarına gəldiyini bildirir. Bu məlumatlar Associated Press tərəfindən də təsdiqlənib və ABŞ-ın İranla artan gərginlik fonunda hərbi mövqeyini gücləndirdiyi göstərilir. Məlumata görə, U.S.S. Gerald R. Ford və ona müşayiət edən gəmi qrupu Karib dənizindən çıxaraq Orta Şərqə yola düşəcək və artıq bölgədə yerləşən USS Abraham Lincoln zərbə qrupuna qoşulacaq.

Fransada təsirini göstərən “Nils” fırtınası səbəbindən 850 minə yaxın ev təsərrüfatında elektrik enerjisi kəsilib. Fransanın Milli Meteorologiya Xidməti “Meteo-France”ın məlumatına görə, güclü külək, daşqın və qar uçqunu riski ilə əlaqədar 5 departament üzrə qırmızı, 29 departament üzrə isə narıncı xəbərdarlıq elan olunub. Ölkənin cənub-qərbində küləyin sürəti saatda 162 kilometrə çatıb.

ABŞ-ın Virciniya ştatında yerləşən İran İnsan Haqları Aktivistləri Xəbər Agentliyi (HRANA) İranda 2025-ci il 28 dekabr tarixində başlayan etiraz aksiyalarında həlak olanların sayının 7 min 2 nəfərə çatdığını açıqlayıb. Məlumata görə, ölkənin müxtəlif bölgələrində keçirilən aksiyalar zamanı 52 min 941 nəfər saxlanılıb. Ölənlər arasında 214 təhlükəsizlik əməkdaşının da olduğu bildirilir. HRANA əlavə 11 min 730 hadisənin araşdırıldığını qeyd edib. Agentlik daha əvvəl ölənlərin sayını 6 min 984 nəfər olaraq açıqlamışdı.

NATO Arktikada fəaliyyətini genişləndirərək Qrenlandiyada yeni “Arctic Sentry” təşəbbüsünü işə salmağa hazırlaşır. Alyansın bu addımı rəsmi olaraq regionda artan təhlükəsizlik çağırışlarına cavab kimi təqdim edilsə də, diplomatik mənbələr təşəbbüsün əsasən siyasi və kommunikasiya xarakteri daşıdığını bildirirlər.

ABŞ Prezidenti Donald Tramp İsrailin Baş naziri Benyamin Netanyahu ilə Vaşinqtonda keçirdiyi görüşdən sonra İranla bağlı konkret qərar qəbul edilmədiyini bildirib. O qeyd edib ki, Tehranla danışıqlar davam etdiriləcək və mümkün razılaşma variantları araşdırılacaq. Tramp sosial şəbəkədə paylaşımında yazıb ki, “heç bir yekun razılaşma əldə olunmayıb, lakin İranla danışıqların davam etdirilməsində israr etmişəm”. O əlavə edib ki, razılaşma mümkün olarsa, bu üstünlük təşkil edəcək variant olacaq.