BAKI,VOA,Yusif Şərifzadə

İslam Əməkdaşlıq Təşkilatı İsrail parlamentində qəbul edilən və məscidlərdə azanın səsucaldıcı vasitəsilə verilməsini məhdudlaşdıran qanun layihəsini kəskin şəkildə pisləyib. Təşkilat sənədin dini etiqad azadlığına zidd olduğunu bildirib.

VOA xəbər verir ki, İslam Əməkdaşlıq Təşkilatı yaydığı bəyanatda qanun layihəsini hüquqi qüvvəsi olmayan, ayrı-seçkilik və irqçilik xarakteri daşıyan qanunvericilik təşəbbüsü kimi qiymətləndirib. Təşkilat bunun dini etiqad və ibadət azadlığının, eləcə də beynəlxalq hüquqla qorunan dini və mədəni hüquqların açıq şəkildə pozulması olduğunu vurğulayıb.

Məlumata görə, İsrail parlamentində keçirilən səsvermədə qanun layihəsi 120 deputatdan 50-nin dəstəyi ilə qəbul olunub, 36 deputat isə əleyhinə səs verib. Layihəyə əsasən, əvvəlcədən rəsmi icazə alınmadan heç bir məsciddə səsucaldıcı qurğunun quraşdırılmasına və istifadəsinə icazə verilməyəcək.

Qanun layihəsinin qüvvəyə minməsi üçün onun parlamentdə daha üç oxunuşdan keçməsi tələb olunur.

İslam Əməkdaşlıq Təşkilatı hesab edir ki, bu təşəbbüs fələstinlilərin mövcudluğunu məhdudlaşdırmağa, ərəb və islam kimliyini hədəfə almağa yönəlmiş qərarların davamıdır. Təşkilat sənədi dini ayinlərə və müqəddəs islam məkanlarına qarşı birbaşa addım kimi qiymətləndirib.