BAKI, VOA, Nailə Babazadə
ABŞ və İsrailin İrana qarşı başlatdığı müharibənin acı nəticələri ağırlaşmaqda davam edir. Tehran Təcili Tibbi Yardım Departamentinin rəis müavini Mehr Soruşun verdiyi məlumata görə, hərbi əməliyyatlar başlayandan bəri təkcə paytaxt Tehranda ən azı 460 nəfər həyatını itirib, 4 min 309 nəfər isə yaralanıb.
VOA xəbər verir ki, İctimai yayımçı "IRIB News"a danışan Soruş bildirib ki, 28 fevraldan bu yana həyata keçirilən hücumlar nəticəsində paytaxtdakı 18 təcili yardım avtomobili və 18 təcili yardım stansiyası ciddi zərər görərək istifadəyə yararsız hala düşüb. Bu vəziyyətin yaralılara ilkin tibbi müdaxilə prosesini və ümumi səhiyyə xidmətlərini ciddi şəkildə iflic etdiyi vurğulanır.
Hücumların təsiri təkcə paytaxtla məhdudlaşmayıb. Ölkə miqyasından gələn ümumi məlumatlara əsasən, hücumlar nəticəsində həlak olanların cəmi sayı 1200-ü keçib, yaralıların sayı isə 10 minin üzərinə çıxıb. Xüsusilə enerji infrastrukturuna və strateji nöqtələrə yönəlmiş hava əməliyyatlarının mülki yaşayış məntəqələrində yaratdığı dağıntıların itkilərin artmasında əsas amil olduğu qeyd edilir.