BAKI, AzerVoice, Nailə Babazadə
Şimali Kipr Türk Cümhuriyyəti (ŞKTC) Prezidenti Tufan Erhürman açıqlayıb ki, o, Cənubi Kipr Rum Administrasiyasının (GKRY) lideri Nikos Hristodulidis ilə Birləşmiş Millətlər Təşkilatının (BMT) iştirakı olmadan birbaşa görüş keçirmək barədə razılığa gəlib. Prezidentin sözlərinə görə, görüşün tarixi hələ müəyyən edilməyib.
AzerVoice xəbər verir ki, Erhürman bu açıqlamanı BMT Baş katibinin Kipr üzrə xüsusi nümayəndəsi və BMT Sülhməramlı Qüvvələrinin (UNFICYP) rəhbəri Xassim Diagne ilə ŞKTC Prezidentliyində baş tutan görüşdən sonra verib. Təxminən yarım saat davam edən görüşdə tərəflər Kipr məsələsi, texniki komitələrin fəaliyyəti və adadakı son siyasi proseslər barədə fikir mübadiləsi aparıblar.
Jurnalistlərə açıqlama verən Erhürman deyib:
“Hristodulidis ilə telefon danışığımız zamanı yaxın həftələrdə bir görüş keçirmək barədə razılaşdıq. BMT-nin iştirak etmədiyi, yalnız hər iki tərəfin öz nümayəndələrinin yer alacağı bir görüş olacaq. Görüşün tarixi hələ dəqiqləşməyib, lakin bu barədə razılığa gəlmişik.”
Prezident əlavə edib ki, BMT Baş katibinin şəxsi nümayəndəsi Maria Angela Holguin Cuellar ilə daimi əlaqə saxlayır və onunla 5 dekabrda görüşə biləcəyini bildirib.
Erhürman, həmçinin Xassim Diagne-yə yeni vəzifəsində uğurlar arzuladığını, iki tərəf arasında gündəlik həyatı asanlaşdıracaq texniki komitələrin fəaliyyətinin gücləndirilməsinin vacibliyini qeyd edib.
BMT-nin Kipr üzrə xüsusi nümayəndəsi Xassim Diagne isə görüşdən sonra açıqlama verərək, Erhürmanla ilk dəfə görüşməkdən məmnunluğunu ifadə edib. O, BMT Baş katibi Antonio Quterreşin 27 oktyabrda Erhürmana göndərdiyi məktubu xatırladaraq, Baş katibin onu vəzifəyə başlaması münasibətilə təbrik etdiyini bildirib.
Diagne vurğulayıb ki, BMT Kipr adasında sülh və sabitliyin təmin edilməsi, eləcə də adadakı bütün icmaların rifahı və təhlükəsizliyinin möhkəmləndirilməsi istiqamətində fəaliyyətini davam etdirəcək:
“Baş katibin və BMT-nin təmsilçisi kimi, Kiprdə davamlı və ədalətli sülhün bərqərar olması üçün bütün səylərimizi göstərəcəyik.”