Bakı, AzerVoice

Liviya Mərkəzi Bankının bazar günü səhər saatlarında oğurlanan İnformasiya Texnologiyaları Departamentinin direktoru Musab Emsalem sərbəst buraxılıb.

AzerVoice xəbər verir ki, müxtəlif mənbələr Emsalemin bazar günü axşam işini bərpa etdiyini bildirib.

Xatırladaq ki, bank rəsmiləri Emsalemin oğurlanmasından sonra bankın bütün əməliyyatlarının dayandırıldığını açıqlamışdı.

Həmçinin açıqlamada Emsalemin sərbəst buraxılıb işə qayıdana və bu cür hadisələrə son qoyulana qədər Bankın fəaliyyət göstərməyəcəyi bildirilmişdi.

ABŞ hadisədən sonra Liviya Mərkəzi Bankına dəstək mesajı vermişdi.

Liviya Mərkəzi Bankı bir müddətdir təhdidlərlə və mübahisələrlə gündəmdədir.

Qeyd edək ki, Mərkəzi Bank Tripoli və Benqazidə iki rəqib hökumət arasında illərdir bölünmüş bir ölkə üçün həyati bir iqtisadi gəlir olan Liviya neft gəlirlərinin beynəlxalq səviyyədə tanınan yeganə depozitaridir,

ABŞ-ın Liviyadakı səfiri Riçard Norland keçən həftə bildirib ki, bankın yüksək idarəetməsinin zorla dəyişdirilməsi cəhdləri Şimali Afrika ölkəsinin beynəlxalq maliyyə bazarlarına çıxışını itirməsinə səbəb ola bilər.

ABŞ səfirliyindən verilən açıqlamaya görə, Norland bankın müdiri Sadık Kebir ilə Tripolidə bankın baş ofisi ətrafında toplaşan silahlı qruplarla bağlı narahatlıqları müzakirə etmək üçün görüşüb.

"Liviyanın sərvətinin bölüşdürülməsi ilə bağlı fikir ayrılıqları vahid, konsensusa əsaslanan bir büdcəyə doğru şəffaf, əhatəli danışıqlar yolu ilə həll edilməlidir" ,- deyə Norland bildirib.

Liviyada 2011-ci ildə NATO-nun dəstəklədiyi qiyam ilə diktator Müəmmər Qəddafinin devrilməsindən bəri ölkə heç sülh üzü görmədi və 2014-cü ildə savaşan şərq və qərb fraksiyaları arasında bölündü.

Avqustun 9-da Tripolinin şərq ətraflarından biri olan Tajurada iki silahlı qrup arasında baş verən toqquşmalarda azı 9 nəfər öldü, 16 nəfər isə yaralandı.

Liviyanın Tripolidə yerləşən Milli Birlik Hökumətinə 2021-ci ildə BMT-nin dəstəklədiyi proseslə qurulan müvəqqəti baş nazir Əbdülhəmid Dibeybe rəhbərlik edir.

Milli parlamentin yerləşdiyi Şərqi Liviya savaş ağası Xəlifə Haftarın ciddi nəzarəti altındadır.

2020-ci ildə atəşkəs və qurumların yenidən təşkil edilməsi səylərinə baxmayaraq, ölkənin birləşdirilməsi ilə bağlı siyasi böhran hələ də davam edir.