BAKI,VOA Orxan Qədirzadə
Almaniyada yaşayan və miqrant ailəsindən olan 27 yaşlı Büşra Seyid ölkənin nüfuzlu gözəllik müsabiqələrindən birinin final mərhələsinə yüksələrək ictimai müzakirələrin mərkəzinə çevrilib. Hicablı iştirakçı kimi finala vəsiqə qazanan gənc qadın bu uğuru yalnız şəxsi nailiyyət deyil, həm də cəmiyyətdə müxtəliflik və təmsilçilik baxımından mühüm hadisə kimi qiymətləndirib.
Berlində yaşayan Büşra Seyid rəqəmsal məzmun istehsalçısı olmaqla yanaşı, hicablı qadınlar üçün geyim sahəsində fəaliyyət göstərən sahibkardır. Onun sözlərinə görə, müsabiqədə iştirakı zahiri görünüşdən daha çox, hicablı qadınların cəmiyyətdəki yerinə dair stereotipləri dəyişdirmək məqsədi daşıyır.
Büşra bildirib ki, final mərhələsinə yüksəlməsi Almaniyada miqrasiya, milli kimlik və inteqrasiya məsələlərinin geniş müzakirə olunduğu bir dövrə təsadüf edib. O hesab edir ki, belə bir platformada təmsil olunması cəmiyyətə fərqli mesaj vermək imkanı yaradıb.
Onun uğuru ölkədə siyasi mübahisələrə də səbəb olub. İfrat sağçı siyasi qüvvələrin bəzi nümayəndələri hicablı qadının gözəllik müsabiqəsinin finalında yer almasını tənqid edərək bunu Almaniyanın ənənəvi dəyərləri ilə əlaqələndirməyə çalışıblar.
Lakin Büşra Seyid tənqidlərə sərt reaksiya vermək əvəzinə fərqli yol seçib. O, sosial şəbəkələrdə yayımladığı yumoristik videolar vasitəsilə ittihamlara cavab verib. Qısa müddətdə milyonlarla baxış toplayan videolar geniş ictimai dəstək qazanıb və müxtəlif dini və etnik mənsubiyyətə malik insanlar tərəfindən müsbət qarşılanıb.
Gənc sahibkarın sözlərinə görə, baş verənlər onun mesajını daha geniş auditoriyaya çatdırmağa kömək edib. O hesab edir ki, yaranan müzakirələr Almaniya cəmiyyətində təmsilçilik, ayrı-seçkilik və bərabər imkanlar mövzusunda vacib dialoqun formalaşmasına şərait yaradıb.
Büşra Seyid irqçilik və ayrı-seçkiliklə bağlı ilk təcrübələrinin uşaqlıq illərinə təsadüf etdiyini də xatırladıb. O bildirib ki, yeniyetmə yaşlarında anasının hicablı olması səbəbindən ictimai yerlərdə təhqiramiz münasibətlə üzləşdiyinin şahidi olub. Həmin hadisələr onun dünyagörüşünün formalaşmasına və gələcək fəaliyyət istiqamətinin müəyyənləşməsinə ciddi təsir göstərib.
Onun sözlərinə görə, həmin vaxt ətrafdakı insanların susqunluğu ona daha çox təsir edib və bu hadisə sonradan cəmiyyətdə stereotiplərlə mübarizə aparmaq qərarını gücləndirib.
Hazırda Büşra Seyid sosial şəbəkələrdə hazırladığı məzmunlarda ayrı-seçkilik və qərəzli yanaşmalar barədə yumor dili ilə danışır. O hesab edir ki, komediya insanların bir-birini daha yaxşı anlamasına və mürəkkəb sosial problemlərin daha rahat müzakirə olunmasına imkan yaradır.
Gənc sahibkarın fikrincə, hicablı qadınların media və ictimai platformalarda daha çox görünməsi cəmiyyətdə mövcud olan yanlış təsəvvürlərin aradan qalxmasına kömək edir və müxtəlif icmalar arasında qarşılıqlı anlaşmanı gücləndirir.
Büşra Seyid qadınlara müraciət edərək bildirib ki, heç kim onların necə geyinməli və necə yaşamalı olduqlarına qərar verməməlidir. O, qadınları cəsarətli olmağa, öz seçimlərinə sadiq qalmağa və ictimai təzyiqlər qarşısında geri çəkilməməyə çağırıb.
Onun sözlərinə görə, qarşıya çıxan çətinliklərə baxmayaraq, hər bir insan öz yolunu seçmək və arzularını reallaşdırmaq hüququna malikdir.