BAKI, AzerVoice, Orxan Qədirzadə

Avropa Komissiyasının sədri Ursula fon der Lyayen bildirib ki, Avropa İttifaqı ilə ABŞ arasında münasibətlərin dəyişməsinin əsas səbəbi Aİ-nin özündə baş verən transformasiyadır.

AzerVoice xəbər verir ki, o, ABŞ-ın 5 dekabr tarixində açıqladığı Milli Təhlükəsizlik Strategiyasında Avropaya dair mövqelərə münasibət bildirərkən “ABŞ ilə münasibətlərimiz dəyişib, çünki biz dəyişmişik.” - deyib.

“Politico”nun məlumatına görə, fon der Lyayen ABŞ prezidentləri ilə hər zaman yaxşı münasibətlər qurduğunu və bunun bu gün də dəyişmədiyini qeyd edib. O, seçkilərin yalnız müvafiq ölkələrin vətəndaşlarını maraqlandırdığını vurğulayaraq, seçici iradəsinin toxunulmaz olduğunu bildirib.

Aİ rəhbəri Brüsselin başqaları ilə müqayisə aparmaq əvəzinə öz gücünə fokuslanmalı olduğunu deyib, transatlantik əlaqələrə sadiqliyini ifadə etməklə yanaşı, Aİ-nin imkanları ilə qürur duyduğunu vurğulayıb. Fon der Lyayen üçün əsas prioritetin Aİ-nin birgə fəaliyyət göstərməli olduğu qeyd olunub.

Xatırladaq ki, Donald Tramp administrasiyasının açıqladığı yeni Milli Təhlükəsizlik Strategiyasında Avropa hökumətlərinin miqrasiya siyasətləri və Ukraynadakı müharibənin dayandırılmasına dair təşəbbüslərlə bağlı tənqidi qeydlər yer almışdı.