BAKI, AzerVoice, Fərid Mikayılov

Argentinada 26 oktyabr 2025-ci ildə keçiriləcək parlament seçkiləri öncəsi mühüm göstərici hesab olunan Buenos Aires əyalət seçkilərində Peronist müxalifət böyük fərqlə qalib gəlib, prezident Xavyer Milei isə ağır məğlubiyyət yaşayaraq siyasi zərbə alıb.

AzerVoice xəbər verir ki, Argentina Milli Seçki İdarəsinin (DINE) istinadən yaydığı xəbərə görə, səslərin 90 faizi açılıb.

Nəticələrə əsasən, Peronistlərin yaratdığı Fuerza Patria (Vətən Gücü) koalisiyası 47 faiz səs toplayıb. Prezident Mileinin rəhbərlik etdiyi La Libertad Avanza (İrəliləyən Azadlıq) hərəkatı isə 34 faizdə qalıb. Müxalifət 8 dairədən 6-da üstünlük əldə edib, iqtidar yalnız 2 dairədə nəticə qazana bilib.

Korrupsiya ittihamı ilə ev dustaqlığında saxlanılan, lakin hələ də Peronistlərin simvolik lideri olan sabiq prezident Kristina Fernandes de Kirçner, evinin önündə toplaşan dəstəkçilərinə eyvandan əl sallayıb.

Prezident Xavyer Milei seçkidən sonra açıqlamasında açıq şəkildə məğlub olduqlarını etiraf edib.

"Əgər yenidən qurmağa və irəliləməyə başlamaq istəyiriksə, əvvəlcə nəticələri qəbul etməliyik. Bu gün istədiyimiz mənzərə ortaya çıxmadı, geri addım atdıq və bunu qəbul etmək məcburiyyətindəyik"- deyə o bildirib.

Milei əlavə edib ki, hökumət nəticələri geniş təhlil edəcək və səhvlərdən nəticə çıxaracaq.

“Siyasi sahədə səhvlər etmişiksə, onları düzəldəcəyik və 26 oktyabr seçkilərində daha yaxşı nəticə əldə etməyə çalışacağıq”- deyə Milei vurğulayıb.

Mütəxəssislərin fikrincə, Buenos Airesdəki nəticələr Milei hökumətinin siyasi mövqeyini zəiflədir və onun islahat planları üçün daha dar imkanlar yaradır.