BAKI, AzerVoice

ABŞ-ın tətbiq etməyi planlaşdırdığı 30 faizlik gömrük rüsumları Avropa İttifaqı (Aİ) ilə ABŞ arasındakı ticarət əlaqələrini məhv edəcək.

AzerVoice xəbər verir ki, bu barədə Aİ-nin ticarət üzrə komissarı Maroş Şefçoviç Aİ Xarici Ticarət Şurasının iclası zamanı deyib.

“30 faiz və ya daha yüksək gömrük tarifləri Aİ ilə ABŞ arasında ticarəti bloklayır, onu faktiki olaraq mümkünsüz edir” – deyə, Şefçoviç vurğulayıb. O əlavə edib ki, ABŞ prezidenti Donald Trampın Brüsselə göndərdiyi məktub məyusluq və təəssüf hissi ilə qarşılanıb.

O qeyd edib ki, Avropa İttifaqı avqustun 1-dək yeni danışıqlar mərhələsinə ümid edir və bu tarixədək Vaşinqtonla tariflərin qarşılıqlı şəkildə ləğvi barədə razılığa gəlmək üçün müzakirələri davam etdirmək niyyətindədir. Şefçoviçin sözlərinə görə, Aİ və ABŞ arasında gömrük rüsumlarının qarşılıqlı ləğvi ilə bağlı danışıqlar “çox irəliləmiş vəziyyətdədir və nəticəyə yaxınlaşır”. Lakin əgər razılaşma əldə olunmasa, Aİ ABŞ-ın rüsumlarına qarşı ölçülmüş və balanslaşdırılmış cavab hazırlayır.

Bundan əvvəl Avropa Komissiyasının rəhbəri Ursula fon der Lyayen bildirmişdi ki, ABŞ-ın Aİ məhsullarına qarşı tətbiq etməyi planlaşdırdığı 30 faizlik gömrük tarifləri əsas transatlantik tədarük zəncirlərini sarsıdacaq.

Xatırladaq ki, Donald Tramp “Truth Social” platformasında Avropa Komissiyasının rəhbərinə ünvanladığı məktubu paylaşmışdı. Həmin məktubda ABŞ-ın avqustun 1-dən etibarən Aİ-dən idxal olunan məhsullara 30 faizlik yeni gömrük tarifləri tətbiq edəcəyi bildirilirdi. Qeyd olunurdu ki, bu tariflər mövcud sektor rüsumlarından (hazırda təxminən 10 faiz) ayrı şəkildə qüvvəyə minəcək. Eyni addım Meksikaya qarşı da nəzərdə tutulub.

ABŞ prezidenti vurğulayıb ki, bu tariflər yalnız o halda ləğv olunacaq ki, Aİ və Meksika öz məhsullarının istehsalını ABŞ ərazisinə köçürsünlər. Əks halda, əgər Aİ və Meksika cavab olaraq ABŞ məhsullarına tarifləri artırarsa, ABŞ da bu məbləğ qədər əlavə gömrük rüsumları tətbiq edəcək.