BAKI, AzerVoice

Pakistan Prezidenti Asif Əli Zərdari ötən gin Şimali Vəziristan vilayətində təhlükəsizlik qüvvələrinin konvoyuna qarşı törədilən hücumu pisləyib.

AzerVoice bu barədə xarici KİV-ə istinadən xəbər verir.

“Hindistan fitnəkarlarının törətdiyi bu hücum zamanı partlayıcılarla dolu avtomobil hərbi konvoya çırpılıb. Onlar vətənin təhlükəsizliyi üçün canlarını fəda etdilər. Millət bu şəhidləri heç vaxt unutmayacaq” - deyə, Zərdari bildirib.

Pakistan Prezidenti onu da vurğulayıb ki, bu cür hücumlar Pakistan millətinin iradəsini sarsıda bilməz.

"Hindistan tərəfindən dəstəklənən terrorizmi tamamilə məhv etməyə qərarlıyıq" - deyə, o əlavə edib.

Xatırladaq ki, şənbə günü Pakistan-Əfqanıstan sərhədi yaxınlığında yerləşən Şimali Vəziristanın Mir Əli bölgəsində hərbi konvoya hücum edilib. Pakistan ordusunun məlumatına görə, intiharçı terrorçu tərəfindən həyata keçirilən bu hücum nəticəsində azı 13 əsgər həlak olub. Həmçinin üç mülki şəxs – iki uşaq və bir qadın ağır yaralanıb. Hücumdan dərhal sonra aparılan əməliyyat nəticəsində 14 silahlı şəxs öldürülüb.

Qeyd edək ki, Pakistan ilə Əfqanıstan sərhədində yerləşən və hüquq-mühafizə orqanlarının nəzarətinin zəif olduğu bölgələr uzun müddət radikal silahlı qruplaşmaların sığınacaq yeri sayılır. İslamabad bu qrupların Əfqanıstanda təlim düşərgələri quraraq Pakistana hücumlar hazırladığını iddia edir. Əfqanıstan isə bu ittihamları rədd edir və problemin Pakistanın daxili məsələsi olduğunu bildirir.

Ölkədə bir neçə radikal qruplaşmanı özündə birləşdirən “Təhrik-i-Taliban Pakistan” təşkilatı uzun illərdir dövlətə qarşı müharibə aparır və özünəməxsus İslam hökuməti qurmağa çalışır. Onlar əsasən Pakistan ordusunu hədəfə alır.