BAKI, AzerVoice

İranın səhiyyə naziri Məhəmməd Rza Zəfərkəndi İsrailin 13 iyundan bu yana həyata keçirdiyi hücumlarda birbaşa olaraq 3 xəstəxana və 6 təcili yardım maşınının hədəf alındığını, 2 həkimin həyatını itirdiyini bildirib.

AzerVoice xəbər verir ki, İran Tələbələr Xəbər Agentliyinin (İSNA) məlumatına görə, Zəfərkəndi məsələ ilə bağlı məlumat verib.

İranlı nazir yaralılara yardım edərkən İsrailin hücumlarında 3 xəstəxana və 6 təcili yardım maşınının, həmçinin bir ginekoloq və bir pediatrın hədəf alındığını bildirib.

Zəfərkəndi hücumların beynəlxalq humanitar hüquqa və tibb işçilərinin toxunulmazlığına zidd olduğunu vurğulayıb.

Qeyd edək ki, iyunun 13-də İsrail İranın müxtəlif şəhərlərindəki nüvə obyektlərini, eləcə də ordunun yüksək komandanlığını hədəf alan irimiqyaslı hücumlara başlayıb.

İranda Baş Qərargah rəisi, İnqilab Keşikçiləri Korpusunun Baş Komandanı, bəzi yüksək səviyyəli komandirlər və 9 nüvə alimi hücumlarda həlak olub.

İranın səhiyyə nazirinin müavini Əbdürrəhman Rüstəmian bu gün verdiyi açıqlamada İsrailin İrana qarşı hücumlarında həyatını itirən mülki vətəndaşların sayının 430-a, yaralıların sayının isə 3500-ə yüksəldiyini bildirib.