Bakı, AzerVoice
Əfqanıstan İslam Əmirliyi administrasiyası ölkənin şimalındakı neft hövzəsindən xam neft ixracını davam etdirir.
AzerVoice xəbər verir ki, Əfqanıstandakı İslam Əmirliyi administrasiyası ölkənin şimalındakı Amudərya (Ceyhun) hövzəsində neftin qazılması və satışına davam edir.
Belə ki, iyun məlumatlarına görə, Əfqanıstan 10 gündə cəmi 80 milyon dollar xam neft satıb.
Əfqanıstanın neft hasilatının gündəlik orta hesabla 8 min barel ətrafında olduğu və tədricən artacağı bildirilir.
Əfqanıstan Mədən və Neft Nazirliyinin sözçüsü Müfti Humayun Əfqanın açıqlamasına görə, İslam Əmirliyi administrasiyası sözügedən dövrdə 130 min ton xam nefti 71,6 milyon dollara satdıqdan sonra eyni gündə 10,5 milyon dollar dəyərində 20 min ton xam nefti da tenderə çıxarıb. Satılan neftin hamısı Amudərya hövzəsindən çıxarılıb.
Qeyd edək ki, Əfqanıstan hökuməti adətən mineralları və nefti hərraclar vasitəsilə satır.
Məlumdur ki, Əfqanıstanın şimal qonşuları ilə paylaşdığı Amudərya hövzəsində 962 milyon barel xam neft və 52 milyard kubmetr təbii qaz olduğu bilinir.
Bölgədə aparılan araşdırma və hesablamalara görə, təkcə şimal bölgəsində 1,6 milyard barel xam neft, 400 milyard kubmetr təbii qaz və 500 milyon barrel təbii qaz mayesinin olduğu bildirilir.
Qeyd edək ki, Əfqanıstanda karbohidrogen ehtiyatlarına görə 6 hövzə və yarımhövzə var. Bunlar Amudərya, Əfqan-Tacik, Tirpul, Kuşka, Hilmend və Katavaz hövzələridir. Xüsusilə şimaldakı hövzələrin Türkmənistandakı böyük enerji ehtiyatlarının davamı olduğu üçün bu bölgələrdən əhəmiyyətli miqdarda neft və qazın çıxarıla biləcəyi bildirilir.
