Bakı, AzerVoice

Cənubi Koreyada əhalinin azalması xüsusilə kənd yerlərində məktəblərin bağlanmasına səbəb olur.

AzerVoice xəbər verir ki , Təhsil Nazirliyinin açıqlamasına görə, kifayət qədər şagird olmadığı üçün 2024-cü ilin sonuna qədər 49 məktəb bağlanacaq.

Bağlanacaq məktəblər ibtidai, orta və ali təhsil müəssisələrini əhatə edir və əsasən kənd yerlərində yerləşir.

Belə ki, ölkədə məktəb yaşlı əhalinin azalması son illərdə daha da sürətlənib. Əgər 2023-cü ildə 22 məktəb bağlanmışdısa, 2024-cü ildə bu rəqəm 33-ə yüksəlib.

Cənubi Koreya 2017-ci ildə “qocalmış cəmiyyət” kateqoriyasına daxil olub. Bu status, 65 və daha yuxarı yaşlı insanların ölkə əhalisinin 14%-ni təşkil etdiyi demoqrafik göstəriciyə əsaslanır.

Doğum nisbətlərinin az olması problemi daha da dərinləşdirir. 2023-cü ildə Cənubi Koreya 0,72 doğum nisbəti ilə dünyada ən aşağı doğum səviyyəsinə malik ölkələrdən biri olub. Ekspertlər bu azalmanın əsas səbəbləri arasında sosial-iqtisadi çətinlikləri və ailə qurmaqda tərəddüdləri göstərirlər.

Bu tendensiyanın davam etməsi gələcəkdə daha çox məktəbin bağlanmasına və təhsil sistemində ciddi dəyişikliklərə səbəb ola bilər.