İsrailin şimal bölgəsində yaşayış məntəqələrinə raket zərbələri endirilib. Kanal 12 televiziyasının yaydığı məlumata görə, İsrailin şimalında yerləşən yaşayış məntəqələrindən birində 9 mərtəbəli bina raket zərbəsinə məruz qalıb. İlkin məlumatlara əsasən, binanın mənzillərindən birində ağır dağıntılar baş verib. Fasad və daxili konstruksiyalara ciddi zərər dəyib, hadisə yerinə xilasetmə briqadaları və təcili yardım qüvvələri cəlb olunub.

Körfəz regionunda artan hərbi eskalasiya fonunda Qətər hava məkanında genişmiqyaslı müdafiə əməliyyatı həyata keçirib. Qətər Müdafiə Nazirliyinin rəsmi bəyanatında ölkə ərazisinə yönəlmiş bir neçə raket hücumunun uğurla dəf edildiyi bildirilib. Nazirliyin məlumatına görə, Qətər ərazisini hədəf alan bütün raketlər hava məkanında müəyyən edilərək hədəfə çatmadan zərərsizləşdirilib.

Körfəzdə yerləşən strateji hərbi obyekt hücuma məruz qalıb. Bəhreyn Xəbər Agentliyi (BNA) tərəfindən yayılan rəsmi məlumata əsasən, ABŞ-ın regiondakı əsas hərbi birləşmələrindən biri olan US 5th Fleet-ə məxsus xidmət mərkəzi raket hücumuna məruz qalıb. Paytaxt Manama yaxınlığında yerləşən mərkəz ABŞ hərbi gəmilərinin logistika təminatı və əməliyyat koordinasiyası baxımından strateji əhəmiyyət daşıyır. İlkin məlumatlara görə, zərbə nəticəsində obyektin infrastrukturuna ciddi ziyan dəyib.

Al Jazeera telekanalının Küveytdəki müxbiri ölkənin müxtəlif bölgələrində güclü partlayış səslərinin eşidildiyini bildirib. Məlumata əsasən, hadisədən dərhal sonra hava həyəcanı siqnalları işə salınıb. Regionda davam edən genişmiqyaslı hərbi eskalasiya fonunda Küveytin hava məkanında təhlükəsizlik rejimi sərtləşdirilib. Partlayışların dəqiq səbəbi – raket hücumu, hava hücumundan müdafiə sistemlərinin fəaliyyəti və ya digər amil – barədə hələlik rəsmi açıqlama verilməyib.

Regionda artan hərbi gərginlik Körfəz ölkələrinə də sirayət edir. Bəhreynin rəsmi media resurslarının yaydığı təcili məlumata əsasən, ölkənin müxtəlif bölgələrində güclü partlayış səsləri eşidilib. Hadisə fonunda krallıq ən yüksək təhlükəsizlik səviyyəsinə keçib. Bəhreyn Daxili İşlər Nazirliyi rəsmi bəyanat yayaraq hava həyəcanı siqnallarının işə salındığını təsdiqləyib. Nazirlik ölkə ərazisində yaşayan bütün vətəndaşlardan və xarici şəxslərdən dərhal ən yaxın təhlükəsiz məkanlara – sığınacaqlara yönəlməyi tələb edib.

Qətər Müdafiə Nazirliyinin məsul rəsmisi Al Jazeera telekanalına verdiyi açıqlamada ölkənin hava məkanını hədəf alan İran raketinin zərərsizləşdirildiyini təsdiqləyib. Rəsmi mənbə bildirib ki, təhdid MIM-104 Patriot hava hücumundan müdafiə sistemi vasitəsilə uğurla vurularaq məhv edilib. Nazirlik əlavə edib ki, hava məkanı tam nəzarət altındadır və müdafiə qüvvələri yüksək döyüş hazırlığı rejimində fəaliyyət göstərir.

İsrail hökuməti İrana qarşı davam edən hərbi əməliyyatların siyasi məqsədlərinə dair növbəti açıqlamasını verib. İsrailin Baş naziri Binyamin Netanyahu İrana qarşı həyata keçirilən genişmiqyaslı hərbi əməliyyatların yalnız təhlükəsizlik məqsədi daşımadığını, həm də İran daxilində siyasi dəyişikliklər üçün zəmin yarada biləcəyini bəyan edib.

Regionda artan hərbi-siyasi gərginlik fonunda Qətər hakimiyyəti rəsmi açıqlama yayıb. Qətər Daxili İşlər Nazirliyi ölkədəki mövcud vəziyyətlə bağlı ictimaiyyəti sakitliyə çağıraraq, təhlükəsizliklə bağlı narahatlıq üçün əsas olmadığını bildirib. Nazirliyin açıqlamasında vurğulanıb: “Qətərdə vəziyyət tamamilə sabit və təhlükəsizdir. Hazırda daxili təhlükəsizlik səviyyəsində narahatlıq doğuracaq hər hansı bir göstərici mövcud deyil.”

İsrailin İrana qarşı həyata keçirdiyi qabaqlayıcı zərbələrdən sonra regionda təhlükəsizlik tədbirləri gücləndirilib. “Reuters” agentliyinin yaydığı məlumata əsasən, ABŞ-ın Qətərdəki səfirliyi bütün əməkdaşları üçün yaşayış yerlərini tərk etməmək barədə ciddi təhlükəsizlik protokolu tətbiq edib. Səfirlik Qətərdə olan ABŞ vətəndaşlarına da növbəti bildirişədək eyni təhlükəsizlik qaydalarına əməl etməyi və yaşayış yerlərində qalmağı tövsiyə edib.

İsrailin yüksək rütbəli təhlükəsizlik rəsmisi ultra-ortodoks yəhudilərin (Haredim) icmasına görünməmiş bir xəbərdarlıq məktubu ünvanlayıb. Məktubda icma üzvlərinin İran kəşfiyyatı tərəfindən casusluq fəaliyyətlərinə cəlb edilməsi cəhdləri barədə ciddi xəbərdarlıq edilir. VOA xəbər verir ki, bu addım ultra-ortodoks gənclərin xarici kəşfiyyatla əməkdaşlıq şübhəsi ilə həbs edilməsi fonunda atılıb.

ABŞ və İran nümayəndə heyətləri Cenevrədə nüvə proqramı ilə bağlı danışıqların üçüncü raundunu keçiriblər. Məlumata görə, ABŞ Prezidenti Donald Tramp İranın nüvə proqramını məhdudlaşdıracaq razılaşmanın əldə olunmasında maraqlıdır və hazırkı vəziyyəti diplomatik irəliləyiş üçün fürsət kimi dəyərləndirir.

“Yediot Axronot” qəzeti İsrail ordusunun ali komandanlığında keçirilən qapalı müzakirələrə istinadən yazıb ki, ABŞ-ın İrana qarşı hərbi əməliyyata başlaması və ya İsrailin müstəqil şəkildə hücum qərarı verməsi ölkə üçün ciddi təhlükələr yarada bilər. Müzakirələrdə mümkün ssenarilər sırasında təyyarələrin vurulması, mülki itkilərin artması, genişmiqyaslı dağıntılar və uzunmüddətli tükəndirmə müharibəsi ehtimalı qeyd olunub.