ABŞ Prezidenti Donald Trampın İranla davam edən müharibəyə dair xalqa müraciəti gözlənilən böyük anonsların əvəzinə, əvvəlki ritorikanın təkrarı ilə yadda qalıb. Ağ Ev rəhbəri 20 dəqiqədən az davam edən çıxışında Vaşinqtonun öz məqsədlərinə çatmağa "çox yaxın" olduğunu iddia edərək, Tehranı ölkənin infrastrukturunu tamamilə məhv etməklə hədələyib.

Ərəb Dövlətləri Liqası İsrail parlamentində (Knesset) qəbul edilən və fələstinli məhbuslar üçün edam cəzasını nəzərdə tutan yeni qanunla bağlı beynəlxalq araşdırma başladılması üçün dünyaya müraciət edib. Ərəb Liqası Şurasının Qahirədə keçirilən fövqəladə iclasından sonra yayılan bəyanatda bu qanun layihəsinin "hərbi cinayət" təşkil etdiyi və aparteid sistemini gücləndirdiyi vurğulanıb.

Birləşmiş Ərəb Əmirliklərinin (BƏƏ) Müdafiə Nazirliyi ölkənin hava hücumundan müdafiə sistemlərinin gün ərzində İrandan buraxılan 19 ballistik raket və 26 pilotsuz uçuş aparatına (PUA) uğurla müdaxilə etdiyini açıqlayıb. Nazirliyin sosial media hesabından verilən bəyanatda bildirilir ki, bütün hədəflər havada aşkar edilərək effektiv şəkildə zərərsizləşdirilib. Bu son əməliyyat regionda gərginliyin artdığı bir vaxtda ölkənin hava məkanının qorunması istiqamətində atılan qətiyyətli addımların davamıdır.

Suriya-Livan sərhədinin kələ-kötür relyefində sarı buldozerlər zirehli texnikalar üçün torpaq bəndlər ucaldır, əsgərlər isə "Hizbullah" tərəfindən istifadə edildiyi bildirilən tunellərdə axtarış aparır. Suriya Müdafiə Nazirliyinin xüsusi icazəsi ilə bölgəyə daxil olan AFP müxbiri bir aydır davam edən hərbi möhkəmlənməni ilk dəfə lentə alıb. Suriya sərhəd keçid məntəqələrinin rəsmisi Məhəmməd Hammud bildirib ki, aparılan təmizləmə əməliyyatları nəticəsində iki ölkəni birləşdirən, silah və narkotik qaçaqmalçılığı üçün istifadə olunan geniş tunel şəbəkəsi aşkar edilib.

Birləşmiş Ərəb Əmirlikləri (BƏƏ) Xarici İşlər Nazirliyi ölkədə yaşayan İran vətəndaşlarının cəmiyyətin "hörmətli və dəyərli" bir hissəsi olduğunu bildirərək, dövlətin onların təhlükəsizliyini və hüquqlarını qorumağa sadiq olduğunu bəyan edib. Təxminən yarım milyon İran vətəndaşının yaşadığı, xüsusilə Dubayda cəmləşdiyi Birləşmiş Ərəb Əmirlikləri qanunun aliliyinə əsaslanan təhlükəsiz və sabit mühiti qoruyub saxlayacağını bildirib. Nazirliyin bəyanatında qeyd olunur ki, bu addım ölkənin dözümlülük və birgəyaşayış kimi sarsılmaz dəyərlərini əks etdirir. Dövlət bütün sakinlərin hüquqlarının qorunmasına təminat verdiyini bir daha xatırladıb.

Livanın Baş naziri Nəvaf Salam paytaxt Beyrutda çıxışı zamanı ölkədə vəziyyətin “çox kritik” olduğunu bildirib. Nəvaf Salam eyni zamanda cənub bölgələrində qalan vətandaşlara təşəkkürünü bildirib, onların cəsarətini yüksək qiymətləndirərək dövlətin onları dəstəkləyəcəyini və bütün zəruri ehtiyacların qarşılanması üçün səylərin davam etdiriləcəyini vurğulayıb

Husilərin İnformasiya nazirinin müavini Məhəmməd Mənsur bildirib ki, əgər münaqişənin miqyası genişlənərsə və ya Körfəz ölkələri birbaşa hərbi əməliyyatlara qoşularsa, Babülməndəb boğazı tamamilə qapadılacaq.

İsrail ordusunun martın 2-dən etibarən Livana qarşı başlatdığı genişmiqyaslı hərbi əməliyyatlar bütün şiddəti ilə davam edir. Livanın rəsmi NNA agentliyinin yaydığı məlumata görə, İsrail hərbi təyyarələri səhər saatlarından başlayaraq ölkənin cənubundakı Dıbbin, Kefer Sir, Haruf, Zibdin, Yatır və Burç Rahhal yaşayış məntəqələrini intensiv bombardman edib. Kefer Sir qəsəbəsində yerləşən iki mərtəbəli binanın hədəf alınması nəticəsində azı 3 mülki şəxs həyatını itirib. Eyni zamanda, sərhəd xəttində yerləşən Hiyam, Sadiykayn və Zıbkin bölgələri ağır artilleriya atəşinə tutulub.

Birləşmiş Ərəb Əmirlikləri beynəlxalq hüququn kobud şəkildə pozulması olan İranın Küveyt Dövlətindəki hərbi düşərgəyə qarşı törətdiyi və silahlı qüvvələrin 10 üzvünün yaralanması ilə nəticələnən səbəbsiz terror hücumunu ən sərt şəkildə pisləyib. Xarici İşlər Nazirliyi (XİN) verdiyi bəyanatda bu təcavüzün Küveyt Dövlətinin suverenliyinin pozulması və təhlükəsizliyinə və sabitliyinə təhdid təşkil etdiyini və bundan əlavə, KƏŞ dövlətlərinin və daha geniş regionun təhlükəsizliyini təhdid edən təhlükəli bir eskalasiyanı təmsil etdiyini təsdiqlədi.

Birləşmiş Ərəb Əmirlikləri, Küveyt Dövləti, Bəhreyn Krallığı, Səudiyyə Ərəbistanı Krallığı, Qətər Dövləti və İordaniya Haşimilər Krallığı İranın açıq-aşkar hücumlarını ən sərt şəkildə pislədiklərini bildirirlər. Hücumlar, istər birbaşa, istərsə də regionda dəstəklədikləri proksi qüvvələr və silahlı qrupları vasitəsilə həyata keçirilməsindən asılı olmayaraq, bu dövlətlərin suverenliyinin, ərazi bütövlüyünün, beynəlxalq hüququn, beynəlxalq humanitar hüququn və Birləşmiş Millətlər Təşkilatının Nizamnaməsinin kobud şəkildə pozulmasıdır.

İraqın paytaxtı Bağdadda 49 yaşlı amerikalı jurnalist Şelli Kittlson naməlum şəxslər tərəfindən qaçırılıb. Çərşənbə axşamı axşam saatlarında baş verən hadisədən sonra jurnalistdən heç bir xəbər alınmayıb. Məsələ ilə bağlı araşdırma aparan təhlükəsizlik ekspertləri Kittlsonun İrandanyönlü "Kataib Hizbullah" qruplaşması tərəfindən oğurlandığını ehtimal edirlər.

ABŞ və İsrailin İrana qarşı müharibəsi fonunda Hörmüz boğazı böhranının konturlarının aydınlaşması ilə Çin Kommunist Partiyası Mərkəzi Komitəsinin rəsmi orqanı olan "Tşiuşi" (Həqiqət axtarışı) jurnalının mart ayının ortalarında Prezident Si Cinpinin dəniz iqtisadiyyatının inkişafı barədə məqaləsini dərc etməsi tamamilə təsadüfi deyil. Si Cinpin həmin məqalədə "güclü dəniz dövləti" quruculuğunun sürətləndirilməsinin zəruriliyini vurğulayıb ki, bu da Çinin dənizə münasibətdə strateji təfəkküründə artan əhəmiyyəti əks etdirən bir addımdır.