BAKI,VOA,Yusif Şərifzadə

2023-cü ildə müharibə başlamazdan əvvəl Qəzzadan hər il ən azı 3 000 zəvvar Həcc ibadətini yerinə yetirirdi.

VOA xəbər verir ki, ABŞ-ın vasitəçiliyi ilə əldə olunan “atəşkəs” çərçivəsində İsrail fevral ayında Qəzzanın xarici dünyaya əsas çıxış qapısı olan Rəfah keçidini qismən açsa da, yalnız həftəlik bir neçə yüz nəfərin – əsasən xəstələrin və az sayda müşayiətçilərin keçməsinə icazə verilib.

Qəzzalı bir sakin vəziyyəti belə təsvir edib: “Keçid bağlıdır. Zəvvarlara niyə bu edilir? Onlar Həcc ibadətini yerinə yetirmək istəyirlər, başqa heç nə istəmirlər. Biz orada olmalı idik, bu müqəddəs günlərdə orada olmalı idik.”

Qəzza kənd təsərrüfatı nazirliyinin məlumatına görə, İsrailin məhdudiyyətləri səbəbindən üçüncü ildir ki, Qəzzalılar Qurban bayramında heyvan kəsə bilmirlər. Nazirlik bildirib ki, 27 mayda qeyd olunacaq Qurban bayramı Həcc ilə üst-üstə düşsə də, İsrailin 2023-cü ilin oktyabrından davam edən hərbi əməliyyatları nəticəsində heyvandarlıq sektoru “sistemli şəkildə məhv edilib”; fermalar, anbarlar, baytarlıq obyektləri və yem ehtiyatları zərər görüb.