BAKI,VOA Orxan Qədirzadə

Iraqda İsrailə aid olduğu iddia edilən “gizli hərbi baza” ilə bağlı yayılan məlumatlar ölkədə geniş müzakirələrə və narahatlığa səbəb olub.

VOA xəbər verir ki, ABŞ-nin “Wall Street Journal” nəşrində dərc olunan hesabatda İraqın Nəcəf və Nuxeyb səhralarında gizli İsrail bazasının mövcudluğu iddia edilib. Hesabat cəmiyyətdə narahatlıq yaradıb və hökumətdən rəsmi açıqlama verilməsi tələblərini artırıb.

İddialara əsasən, 2026-cı ilin mart ayında Nuxeyb bölgəsində hava və quru qarşıdurması baş verib. Hadisə zamanı şübhəli fəaliyyətin müşahidə edildiyi ərazidə yoxlama aparan İraq qüvvələri ilə naməlum silahlı qrup arasında toqquşma yaşanıb və bir iraqlı hərbçi həlak olub.

Hesabatda qeyd olunur ki, qarşı tərəfin hava dəstəyi aldığı bildirilsə də, həmin qüvvələrin kimliyi tam müəyyən edilməyib.

İraq isə məsələ ilə bağlı yayılan məlumatları təkzib edib. Rəsmi açıqlamada İraq ərazisində xarici hərbi bazaların olmadığı bildirilib.

Qurum hadisə zamanı qarşıdurmanın “qeyri-nizamlı və naməlum silahlı qrup” ilə yaşandığını açıqlasa da, həmin qrupun hara bağlı olduğu barədə məlumat verməyib.

Bu arada, İraq parlamentinin Təhlükəsizlik və Müdafiə Komitəsi məsələni araşdırmaq üçün təhlükəsizlik rəhbərlərini parlamentə dəvət etməyə hazırlaşır.

Komitədə əsas müzakirə mövzularından birinin İraq ərazisinin Irana qarşı mümkün əməliyyatlar üçün logistik platforma kimi istifadə olunması iddiaları olacağı bildirilir.

Ekspertlər hesab edirlər ki, regionda artan gərginlik və İran–İsrail qarşıdurması fonunda bu cür iddialar İraqın daxili təhlükəsizlik gündəmini daha da həssas vəziyyətə gətirə bilər.