BAKI,VOA, Orxan Qədirzadə

Ərəb dünyasında ən varlı ailələrin yeni reytinqi açıqlanıb və regionun iqtisadi güc balansını əks etdirən siyahı formalaşıb.

VOA xəbər verir ki, 2026-cı ildə ilk beşliyə daxil olan ərəb ailələrinin ümumi sərvəti 58 milyard dollara çatır və siyahıya Hüseyn Sacvani rəhbərlik etdiyi Sacvani ailəsi başçılıq edir.

Siyahının ilk pilləsində qərarlaşan Sacvani ailəsi Birləşmiş Ərəb Əmirliklərində fəaliyyət göstərən ən güclü biznes imperiyalarından birinə sahibdir. Ailənin sərvəti əsasən daşınmaz əmlak sektorunda uzun illər ərzində qurulan və genişlənən layihələr hesabına formalaşıb. “DAMAC Properties” şirkəti vasitəsilə böyük kapital toplayan Hüseyn Sacvani regionun aparıcı biznes fiqurlarından biri kimi tanınır. Onun oğlu Abbas Sacvani isə Dubayda həyata keçirdiyi lüks layihələrlə ailə biznesini inkişaf etdirir.

İkinci yerdə qərarlaşan Saviris ailəsi Misirin ən zəngin ailəsi hesab olunur. Nassef Saviris, Naquib Saviris və Samih Saviris qardaşlarının rəhbərlik etdiyi bu ailənin sərvəti əsasən sənaye, telekommunikasiya və turizm sahələrində qurulan iri biznes layihələrinə əsaslanır.

Üçüncü pillədə yer alan Əl-Muhaidib ailəsi Səudiyyə Ərəbistanında daşınmaz əmlak və otelçilik sahəsində geniş şəbəkəyə malikdir. İbrahim Əl-Muhaidibin rəhbərliyi ilə fəaliyyət göstərən biznes strukturları ailənin maliyyə gücünü möhkəmləndirir.

Dördüncü sırada Livanı təmsil edən Mikati ailəsi qərarlaşıb. Nəcib Mikati və Taha Mikati qardaşları telekommunikasiya sektorunda qurduqları biznes vasitəsilə böyük sərvət əldə ediblər və “M1 Group” vasitəsilə beynəlxalq investisiyalar həyata keçirirlər.

Beşinci yerdə isə Mansur ailəsi yer alır. Məhəmməd Mansurun rəhbərlik etdiyi “Mansour Group” avtomobil, pərakəndə satış və sənaye sektorlarında geniş fəaliyyət göstərir və qlobal şirkətlərlə əməkdaşlıq edir.

Analitiklər qeyd edir ki, bu ailələrin sərvəti yalnız tarixi mirasdan deyil, həm də strateji investisiyalar, biznesin şaxələndirilməsi və qlobal bazarlara çıxış nəticəsində formalaşıb.