BAKI,VOA, Orxan Qədirzadə

Kürdistan Vətənsevərlər Birliyinin (KYB) sədri Bafel Talabani İraqdakı son siyasi vəziyyət və regional gərginliklə bağlı mühüm bəyanatlarla çıxış edib.

VOA xəbər verir ki, o, bölgədə sülhün bərqərar olması üçün göstərdiyi səylərə görə Türkiyə rəhbərliyinə minnətdarlığını bildirib.

Bafel Talabani yaydığı video-müraciətdə ABŞ, İsrail və İran arasındakı gərginliyin azaldılması, tərəflərin danışıqlar masasına gətirilməsi istiqamətindəki fəaliyyətinə görə Türkiyə Respublikasının Prezidenti Rəcəb Tayyib Ərdoğana və Türkiyəyə xüsusi təşəkkürünü ifadə edib.

Talabani qeyd edib ki, Türkiyə və digər tərəfdaş ölkələrin pərdəarxası diplomatik səyləri bölgəni böyük müharibədən qorumaq üçün həlledici rol oynayıb.

Çıxışı zamanı Talabani İraq ərazisindən hücuma məruz qalan bütün qonşu ərəb ölkələrindən dərindən üzr istədiyini və baş verənlərdən utanc duyduğunu vurğulayıb. İraqda qurulacaq yeni hökumət barədə də danışan KYB lideri, silahların yalnız dövlətin nəzarətində olacağı, müstəqil, vətənpərvər və xalqın rifahı üçün çalışan yeni bir idarəçilik sisteminin formalaşdırılacağını vəd edib.