BAKI,VOA, Nailə Babazadə

İraq Parlamenti keçirdiyi səsvermədə Kürdüstan Vətənpərvərlər İttifaqı (PUK) namizədi, 58 yaşlı Nizar Amidini 329 yerlik məclisdə ikinci tur səsvermə zamanı 227 səslə ölkənin yeni Prezidenti seçdi. Səsvermədə ümumilikdə 229 deputat iştirak edib.

İraqda 2003-cü ildən sonra qurulan siyasi müvazinətə əsasən, prezident kürd partiyalarının namizədləri arasından seçilir. Bu vəzifə üçün Kürdüstan Demokrat Partiyası (KDP) hazırkı Xarici İşlər naziri Fuad Hüseyni, Kürdüstan Vətənpərvərlər İttifaqı (PUK) isə Nizar Amidini namizəd göstərmişdi. Sözügedən post uğrunda KDP və KYB namizədləri də daxil olmaqla ümumilikdə 17 nəfər yarışırdı. Amedi seçildikdən sonra parlamentdə and içərək vəzifəsinin icrasına başlayıb.

İraq konstitusiyasına görə, prezidentin səlahiyyət müddəti 4 ildir və eyni şəxs yalnız bir dəfə yenidən seçilə bilər. Konstitusiyaya əsasən, Prezident seçildikdən sonra ən geci 15 gün ərzində parlamentdəki ən böyük blokun (Şiə) namizədini hökuməti qurmaqla vəzifələndirir.

Qeyd edək ki, İraqda parlament seçkiləri 11 noyabr 2025-ci il tarixində keçirilmişdi. Ölkədə yaşanan siyasi fikir ayrılıqları səbəbindən yeni hökumət hələ də formalaşmayıb. Mövcud hökumət isə "cari işləri icra edən hökumət" kimi fəaliyyətini davam etdirir.

Yeni Prezident KYB-nin Bağdad bürosunun rəhbəri olmaqla yanaşı, İraq Prezidentinin müşaviri və Ətraf Mühit naziri vəzifələrində çalışıb.