BAKI,VOA, Nailə Babazadə

Livan Prezidenti Cozef Aun cümə günü verdiyi bəyanatda İsrail hərbi hava qüvvələrinin ölkənin cənubundakı Nəbatiyə şəhərində yerləşən hökumət binasına endirdiyi zərbə nəticəsində 13 dövlət təhlükəsizlik əməkdaşının həlak olduğunu açıqlayıb.

VOA xəbər verir ki, prezident bu hücumu kəskin pisləyərək, dövlət təsisatlarının hədəf alınmasının Livanı öz suverenliyini müdafiə etməkdən çəkindirməyəcəyini vurğulayıb.

"Qara Çərşənbə" adlandırılan şiddətli hücumlardan sonra Avropa və Ərəb ölkələrinin İsrailə Beyrutu hədəf almamaq üçün ciddi təzyiq göstərdiyi bildirilir. Qərb diplomatlarının verdiyi məlumata görə, xüsusilə körfəz ölkələri və Misir paytaxtdakı mülki infrastrukturun, o cümlədən beynəlxalq hava limanının qorunması üçün dövriyyədədir. Ümumdünya Səhiyyə Təşkilatı (ÜST) isə İsrailin Beyrutdakı xəstəxanaların boşaldılması barədə xəbərdarlığını ləğv etməyə çağırıb.

Gələn həftə Livan və İsrail hökumətləri arasında Vaşinqtonda müharibəni dayandırmaq üçün birbaşa danışıqların başlayacağı gözlənilir. Hizbullah lideri Naim Qasım isə Livan hökumətini İsrailə "pulsuz güzəştlər" verməməyə çağırıb. O, İsrailin quruda irəliləyə bilmədiyini və hərbi kampaniyasının uğursuzluğa düçar olduğunu iddia edərək, müqavimətin "son nəfəsə qədər" davam edəcəyini bildirib.

İsrail ordusu bu günə qədər Livanda 4300-dən çox Hizbullah mövqeyini məhv etdiyini və 1400-dən çox döyüşçünü öldürdüyünü iddia edib. Hizbullah isə buna cavab olaraq İsrailin şimalına raket zərbələri endirdiyini və cənubdakı Aşdod şəhərində yerləşən hərbi dəniz bazasını hədəf aldığını açıqlayıb. Mart ayından bəri davam edən şiddətli qarşıdurmalarda Livanda ölənlərin sayının 1900-ə çatdığı bildirilir.