BAKI,VOA, Nailə Babazadə

Livan Səhiyyə Nazirliyi İsrail ordusunun ölkə daxilində həyata keçirdiyi intensiv hava hücumları nəticəsində ilkin məlumatlara görə onlarla insanın həyatını itirdiyini, yüzlərlə insanın isə yaralandığını açıqlayıb.

VOA xəbər verir ki, İsrail hərbi hava qüvvələrinin Livanın bir çox bölgəsini eyni vaxtda hədəf aldığı bildirilir.

İsrail ordusu günorta saatlarında başda paytaxt Beyrut olmaqla, Livanın cənub və şərqindəki onlarla məntəqəyə koordinasiyalı zərbələr endirib. İsrail tərəfindən verilən rəsmi açıqlamada cəmi 10 dəqiqə ərzində fərqli bölgələrdəki 100 hədəfin eyni vaxtda vurulduğu qeyd edilib. Bu qısamüddətli, lakin dağıdıcı hücum dalğası ölkədə ciddi xaos və böyük insan itkisinə səbəb olub.

Səhiyyə Nazirliyi hazırda əsas prioritetin dağıntılar altında qalanların xilas edilməsi və yaralıların təcili şəkildə xəstəxanalara çatdırılması olduğunu vurğulayıb. Xüsusilə Beyrutun sıx məskunlaşmış məhəllələrində xilasetmə və tibbi yardım qruplarının maneəsiz hərəkət edə bilməsi üçün vətəndaşlardan yolları açıq saxlamaları xahiş olunub. Nazirlik yaralıların sayının çoxluğu səbəbindən xəstəxanalarda gərginliyin artdığını bildirərək əhaliyə çağırış edib.

Hazırda bir çox bölgədə enkaz altında qalan mülki şəxslərin çıxarılması üçün genişmiqyaslı xilasetmə işləri davam etdirilir.