BAKI,VOA, Nailə Babazadə

İraqın qərbindəki Ənbar vilayətində şiə "Həşdi-Şabi" (Xalq Səfərbərlik Qüvvələri - PMF) qüvvələrinə məxsus obyektə endirilən hava zərbələri nəticəsində azı 14 döyüşçü həlak olub, 30 nəfər isə yaralanıb. Həlak olanlar arasında qruplaşmanın Ənbar üzrə əməliyyat komandiri də var.

VOA xəbər verir ki, "Həşdi-Şabi" yaydığı bəyanatda Ənbar komandiri Saad əl-Beycinin və onun bir neçə silahdaşının ölümünü təsdiqləyib. Qruplaşma hücumda Amerika Birləşmiş Ştatlarını ittiham edərək, ABŞ-ın hava zərbəsinin şəxsi heyətin xidmətdə olduğu vaxt komandanlıq qərargahını hədəf aldığını bildirib. Mənbələrin bildirdiyinə görə, zərbələr yüksək rütbəli komandirlərin iştirakı ilə keçirilən təhlükəsizlik iclası zamanı endirilib.

Eyni zamanda, İraq Kürdüstanının Ərbil şəhərindən şimalda yerləşən hərbi bazaya endirilən raket zərbəsi nəticəsində azı 6 kürd Peşmərgə döyüşçüsü həlak olub, 22-si isə yaralanıb. Təhlükəsizlik mənbələri bu hücumun kim tərəfindən həyata keçirildiyinin hələlik məlum olmadığını qeyd ediblər.

Xatırladaq ki, fevral ayında ABŞ və İsrailin İrana qarşı müharibəsi başladıqdan bəri Tehran tərəfindən dəstəklənən silahlı qruplar İraqdakı ABŞ bazalarına hücumları artırıblar. Bu vəziyyət regional münaqişənin daha da genişlənməsi qorxusunu artırır. Münaqişə artıq İran sərhədlərini aşaraq genişlənib; Tehran İsrailə və ABŞ hərbi obyektlərinə ev sahibliyi edən Körfəz ölkələrinə zərbələr endirib, İsrail isə İranyönümlü "Hizbullah"ın atəşinə cavab olaraq Livanda əməliyyatlar keçirib.