BAKI,VOA, Nailə Babazadə

İsrailin İrana qarşı cavab tədbirlərini əsas gətirərək təxminən 20 gün bağlı saxladığı, lakin bir neçə gün əvvəl piyadaların keçidi üçün məhdud şəkildə açdığı Rəfah Sərhəd Keçid Məntəqəsindən 28 fələstinli Qəzza zolağına qayıdıb.

VOA xəbər verir ki, xəstəxana mənbələrindən alınan məlumata görə, aralarında qadın və uşaqların da olduğu Misirdən gələn 28 nəfər Xan Yunisdəki Nasir Xəstəxanasına çatıb. Uzun fasilədən sonra ailələri və yaxınları ilə bir araya gələn fələstinlilər duyğulu anlar yaşayıblar.

İsrail ordusunun İrana qarşı hücumlarından sonra bağladığı və Qəzza zolağının dünyaya açılan yeganə qapısı olan Rəfah keçid məntəqəsinin 19 martda yalnız piyadaların keçidi üçün yenidən açıldığı bildirilmişdi. İsrail mediasında yer alan xəbərlərdə Tel-Əviv rəhbərliyinin ABŞ-ın təzyiqi ilə bu qapını açmaq məcburiyyətində qaldığı qeyd olunub.

İsrail ordusu 28 fevralda Qəzzanın yeganə çıxış nöqtəsi olan Rəfah da daxil olmaqla, bölgəyə açılan bütün qapıların ikinci bir xəbərdarlığa qədər bağlı qalacağını elan etmişdi. Qeyd edək ki, İsrail işğal altında saxladığı bu məntəqəni fevralın 2-də yalnız iki tərəfli piyada keçidi üçün açmışdı.

Hazırda İsrailin tətbiq etdiyi ciddi blokada və məhdudiyyətlər səbəbindən Qəzza zolağında humanitar fəlakət yaşanır. Su, dərman və tibbi ləvazimatların tapılmadığı bölgədə təxminən 22 min xəstə və yaralı müalicə üçün xaricə çıxmaq üçün növbə gözləyir. Birləşmiş Millətlər Təşkilatı (BMT) atəşkəsdən sonra belə İsrailin məhdudiyyətləri səbəbindən bölgəyə yetərli yardımın daxil olmadığını vurğulayır.