BAKI, VOA, Nailə Babazadə

Misir hökuməti Yaxın Şərqdə genişlənən hərbi gərginlik fonunda ərəb dövlətlərinin suverenliyini və təhlükəsizliyini qorumaq üçün vahid birgə hərbi qüvvənin yaradılması təklifini yenidən gündəmə gətirib.

VOA xəbər verir ki, Misirin Xarici İşlər naziri Bədr Abdelatti Körfəz Əməkdaşlıq Şurası (KƏŞ) ilə keçirilən görüşdə regionun hərtərəfli xaos və genişmiqyaslı müharibə təhlükəsi ilə üz-üzə olduğu barədə xəbərdarlıq edib.

Qahirə rəhbərliyi son günlərdə İran tərəfindən Körfəz ölkələrinə qarşı həyata keçirilən hücumları qətiyyətlə pisləyib və bu zərbələrin heç bir bəhanə ilə qəbul edilə bilməyəcəyini vurğulayıb. Nazir Abdelatti qeyd edib ki, Körfəz ölkələrinin, həmçinin İordaniya və İraqın təhlükəsizliyi Misirin milli təhlükəsizliyinin ayrılmaz hissəsidir və Misir bu həssas dönəmdə öz ərəb qardaşlarının yanındadır.

Mövcud risklərin qarşısını almaq məqsədilə Misir 1950-ci ildə imzalanmış Birgə Müdafiə və İqtisadi Əməkdaşlıq Müqaviləsinin dərhal aktivləşdirilməsini və konkret addımların atılmasını təklif edib. Bu çərçivədə həm daxili, həm də xarici təhdidlərə qarşı effektiv mübarizə apara biləcək birgə ərəb ordusunun formalaşdırılması Misirin əsas təşəbbüslərindən biri kimi qeyd olunub.

Eyni zamanda, Misir Hörmüz boğazı və digər strateji su yollarında beynəlxalq dəniz naviqasiyasının azadlığının qorunmasının qlobal ticarət üçün həyati əhəmiyyət kəsb etdiyini bəyan edib. Rəsmi Qahirə istənilən maneə yaratma cəhdini regional sabitliyə birbaşa təhlükə kimi qiymətləndirərək, gərginliyi azaltmaq üçün diplomatiya və dialoqun prioritet seçilməsinin vacibliyini vurğulayıb.

Körfəz ölkələrinin nümayəndələri Misirin bu prinsipial və dəstəkləyici mövqeyini yüksək qiymətləndirərək, Qahirənin regional sülhün qorunmasında aparıcı rol oynadığını bildiriblər.