Close Menu
    Yaxın Şərq

    HƏMAS blokadanın ləğvini və hüquqların təminini tələb edir

    HƏMAS blokadanın ləğvini və hüquqların təminini tələb edir
    Bizi buradan izləyin və Bizə yazın

    BAKI, VOA, Nailə Babazadə

    Qəzzanın gələcəyi ilə bağlı müzakirələr İsrailin “təcavüzünün” tam dayandırılması ilə başlamalıdır.

    VOA xəbər verir ki, bu barədə Fələstin hərəkatı HƏMAS ABŞ Prezidenti Donald Trampın Sülh Şurasının ilk iclasından sonra bəyan edib.

    “Qəzza zolağı və Fələstin xalqımızın gələcəyi ilə bağlı müzakirə olunan hər hansı siyasi proses və ya razılaşma İsrailin təcavüzünün tam dayandırılması, blokadanın aradan qaldırılması və xalqımızın qanuni milli hüquqlarının – ilk növbədə azadlıq və öz müqəddəratını təyin etmə hüququnun təmin olunması ilə başlamalıdır.”- HƏMAS cümə axşamı yaydığı açıqlamada qeyd edib.

    Trampın Sülh Şurası cümə axşamı Vaşinqtonda ilk iclasını keçirib. İsrail ilə HƏMAS arasında dörd aydan artıqdır davam edən kövrək atəşkəs fonunda bir sıra ölkələr Fələstin ərazilərinin bərpası üçün maliyyə və insan resursları ayıracaqlarına söz veriblər.

    Bununla belə, İsrailin Baş naziri Benyamin Netanyahu bərpa prosesinə başlanmazdan əvvəl HƏMAS-ın silahsızlaşdırılmalı olduğunu bildirib.

    “Biz müttəfiqimiz ABŞ ilə razılaşdıq ki, Qəzzanın demilitarizasiyası başa çatmadan bərpa işlərinə başlanmayacaq”, – deyə Netanyahu vurğulayıb.

    Netanyahu Vaşinqtondakı iclasda iştirak etməsə də, onu xarici işlər naziri Gideon Saar təmsil edib.

    Tramp bildirib ki, bir neçə ölkə Qəzzanın bərpası üçün 7 milyard dollardan çox vəsait ayırmağa hazır olduğunu bəyan edib.

    Müsəlman əhalinin çoxluq təşkil etdiyi İndoneziya isə yeni yaradılan Beynəlxalq Sabitləşdirmə Qüvvələrində komandir müavini vəzifəsini icra edəcək. Bu barədə qurumun amerikalı rəhbəri, general-mayor Jasper Ceffers məlumat verib.

    Trampın Qəzza ilə bağlı planı ötən ilin noyabrında BMT Təhlükəsizlik Şurası tərəfindən dəstəklənib. ABŞ Prezidenti əlavə edib ki, beş ölkə – Mərakeş, Qazaxıstan, Kosovo və Albaniya daxil olmaqla – hərbi qüvvə ayırmağa razılıq verib.

    Oxşar Xəbərər

    © 2026 Azervoice.