BAKI, AzerVoice, Nailə Babazadə
Qətərin paytaxtı Dohada bazar günü Livan Silahlı Qüvvələri və Daxili Təhlükəsizlik Qüvvələrinə dəstək məqsədilə Parisdə keçiriləcək beynəlxalq konfrans ərəfəsində hazırlıq iclası baş tutacaq.
AzerVoice xəbər verir ki, Doha görüşündə Fransa, ABŞ, Səudiyyə Ərəbistanı, Qətər və Misir olmaqla beş sponsor ölkə, eləcə də digər dövlətlər və beynəlxalq təşkilatlar iştirak edəcək. Məqsəd Livan ordusunun ehtiyaclarını müəyyənləşdirmək və martın 5-də Parisdə keçiriləcək əsas konfrans üçün maliyyə və hərbi dəstək mexanizmlərini formalaşdırmaqdır.
Fransız rəsmilərin gözləntisinə görə, Paris konfransında 50-yə yaxın ölkə və 10 beynəlxalq təşkilat təmsil olunacaq. Tədbir Fransa Prezidenti Emmanuel Makron və Livan Prezidenti Cozef Aun tərəfindən birgə təşkil ediləcək.
Paris Livan ordusunun BMT Təhlükəsizlik Şurasının 1701 saylı qətnaməsinə uyğun olaraq silahsızlaşdırma prosesini davam etdirməsinin vacibliyini vurğulayır. Eyni zamanda beynəlxalq tərəfdaşların ordunun maliyyə, hərbi və logistika ehtiyaclarını koordinasiyalı şəkildə qarşılaması üçün mexanizm yaradılması nəzərdə tutulur. Fransanın hesablamalarına görə, Livan ordusunun illik ehtiyacları 1 milyard dollardan çoxdur.
Müzakirələrdə Livanın Suriya ilə münasibətləri, sərhədlərin müəyyənləşdirilməsi, suriyalı məhbusların geri qaytarılması, eləcə də İsraillə davam edən gərginlik məsələləri də gündəmdədir. Bundan başqa, Fransa Livanda maliyyə islahatlarının sürətləndirilməsini və Beynəlxalq Valyuta Fondu ilə Dünya Bankının yaz iclaslarına qədər müvafiq qanunların qəbul edilməsini vacib hesab edir