BAKI, AzerVoice, Səməd Əyyubov

Qətər rəhbərliyi İsrail Hərbi Hava Qüvvələrinin HƏMAS liderlərinə qarşı Dohada həyata keçirdiyi hücumları qətiyyətlə pisləyib.

AzerVoice xəbər verir ki, bu barədə Qətər Xarici İşlər Nazirliyinin sözçüsü Məcid əl-Ənsari açıqlama verib.

“Qətər Dövləti bu hücumu qətiyyətlə pisləyərək bildirir ki, İsrailin bu məsuliyyətsiz davranışına və regional təhlükəsizliyə davamlı müdaxilə cəhdlərinə dözməyəcək" - deyə, o bildirib.

XİN sözçüsü həmçinin hadisə ilə bağlı istintaq başladıldığını və təfərrüatların açıqlanacağını qeyd edib.

O, hücumun hədəfinin HƏMAS-ın bəzi siyasi büro üzvlərinin yerləşdiyi yaşayış binaları olduğunu təsdiqləyib və bu bombardmanı bütün hüquq normalarını ciddi şəkildə pozan, Qətər sakinlərinin təhlükəsizliyinə ciddi təhdid yaradan cinayətkar hücum adlandırıb.

Qeyd edək ki, “Əl-Cəzirə” telekanalının məlumatına görə, zərbələrinin endirildiyi hədəf yaşayış məhəlləsində yerləşirdi. Dohadakı partlayışlar barədə ilk məlumatı şahidlər vermişdi. İsrail Müdafiə Qüvvələri və Şin Bet xüsusi xidməti isə hücumların HƏMAS rəhbərliyinə qarşı həyata keçirildiyini bəyan etsələr də, əməliyyatın dəqiq ünvanını açıqlamayıblar.