BAKI, AzerVoice
ABŞ-ın İrandakı Fordo nüvə obyektinə endirdiyi zərbə tənzimləyici əhəmiyyətə malik infrastrukturun məhvinə və uranın zənginləşdirilməsi obyektinin sıradan çıxmasına səbəb olub. Beləliklə, ABŞ və İsrailin həyata keçirdiyi hücumlar İranın nüvə silahı hazırlamaq imkanlarını bir neçə il geriyə atıb.
AzerVoice xəbər verir ki, bu barədə İsrailin Atom Enerjisi İdarəsinin adından Baş nazir Benyamin Netanyahunun ofisi bəyanat yayıb.
“ABŞ-ın Fordoya endirdiyi dağıdıcı zərbə obyektin infrastrukturunu məhv edib və uran zənginləşdirmə prosesini tamamilə dayandırıb. Hesab edirik ki, ABŞ-ın İranın nüvə obyektlərinə, İsrailin isə İranın hərbi nüvə proqramının digər komponentlərinə endirdiyi zərbələr bu ölkənin nüvə silahı hazırlamaq imkanlarını bir neçə il geriyə atıb” - deyə, bəyanatda bildirilib.
Sənəddə o da vurğulanır ki, bu "strateji nəticə" yalnız o halda qorunub saxlanıla bilər ki, “İran nüvə materiallarına çıxış imkanı əldə etməsin.”
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
ABŞ prezidenti Donald Trampın bəyanatına əsasən, İsrail və İran tam atəşkəsə razılıq veriblər. İsrail hakimiyyəti ABŞ-ın təklifini qəbul etdiyini və qarşıya qoyulan bütün məqsədlərə nail olunduğunu bəyan edib.