BAKI, AzerVoice

İran, ABŞ-ın ölkədəki Fordo, Natanz və İsfahan şəhərlərində yerləşən nüvə obyektlərinə endirdiyi zərbələrdən sonra Beynəlxalq Atom Enerjisi Agentliyinin (BAEA) İdarəçilər Şurasının təcili iclasının keçirilməsini tələb edib.

AzerVoice xəbər verir ki, bu barədə İranın Xarici İşlər Nazirliyinin (XİN) yaydığı bəyanatda deyilir.

“Bu gün MAQATE-nin və şəxsən baş direktorun [Rafael Qrossi] məsuliyyəti heç vaxt olmadığı qədər aydındır. O, döyüşən tərəflərdən birinə açıq-aşkar tərəfkeşlik nümayiş etdirərək son fəlakətə zəmin yaratmışdır. Biz MAQATE-nin İdarəçilər Şurasını təcili iclas keçirməyə və agentliyin ciddi nəzarəti altında olan, Zəmanətlər haqqında Saziş çərçivəsində fəaliyyət göstərən İranın dinc nüvə obyektlərinə qarşı ABŞ tərəfindən həyata keçirilmiş bu təhlükəli hücumla bağlı hüquqi öhdəliklərini yerinə yetirməyə çağırırıq” – deyə, bəyanatda vurğulanıb.

Qeyd edək ki, ABŞ Prezidenti Donald Tramp 22 iyuna keçən gecə ölkəsinin Hərbi Hava Qüvvələrinin İran ərazisində üç nüvə obyektinə – Fordo, Natanz və İsfahana qarşı uğurlu hücum həyata keçirdiyini açıqlamışdı. O, İranı münaqişəni dayandırmağa çağırmışdı.