BAKI, AzerVoice

İsrail ordusunun İranın İsfahan şəhərində yerləşən nüvə obyektinə hücumu radioloji nəticələr doğurmayacaq. Buna səbəb həmin obyektin nüvə materialı ehtiva etməməsidir.

AzerVoice xəbər verir ki, bu barədə Beynəlxalq Atom Enerjisi Agentliyinin (BAEA) baş direktoru Rafael Qrossi məlumat verib.

“Bizim bu obyekt barədə yetəri qədər məlumatımız var. Orada nüvə materialı yox idi, buna görə də hücumun radioloji nəticələri olmayacaq” – deyə, məlumatda bildirilib.

Xatırladaq ki, bu gün səhər saatlarında İsrail tərəfindən İsfahan şəhərində yerləşən Natanz Nüvə obyektinə və ətraf bölgələrə hücumlar həyata keçirilib. İsfahan valiliyinin məlumatına görə, hava hücumundan müdafiə sistemləri (HHM) hücumları dəf edib və hər hansı nüvə sızması qeydə alınmayıb.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.