Bakı, AzerVoice

Ərəb ölkələri ABŞ dövlət katibinə Fələstinin deportasiya planına qarşı birgə mesaj göndərəcək.

AzerVoice xəbər verir ki, Ərəb ölkələri ABŞ dövlət katibi Marko Rubioya prezident Donald Trampın Qəzzadakı fələstinliləri digər ərəb ölkələrinə, xüsusilə İordaniya və Misirə deportasiya etmək fikrinə qarşı ortaq mövqe nümayiş etdirəcək mesaj göndərəcək.

İsrailin dövlət telekanalı KAN iddia edib ki, ərəb ölkələri ABŞ prezidenti Trampın fələstinliləri Qəzzadan qovmaq ideyasına alternativ planlar hazırlamağa çalışırlar.

Xəbərdə şənbə günü Misirin paytaxtı Qahirədə keçirilən ərəb ölkələrinin xarici işlər nazirlərinin toplantısının məqsədinin Trampın fələstinliləri sürgün etmək fikrinə qarşı mümkün qədər tez geniş və vahid ərəb cəbhəsi yaratmaq olduğu şərh edilib.

Ərəb ölkələrinin ABŞ-ın dövlət katibi Rubioya öz mövqelərini bildirən birgə mesaj göndərəcəkləri bildirilib.

Bu kontekstdə ərəb ölkələrinin Qəzza zolağının yenidən qurulması prosesi başlayana qədər bölgədəki fələstinlilərin vəziyyətini sürətlə yaxşılaşdırmağı hədəflədiyi qeyd edilib.

Digər tərəfdən Misirin Birləşmiş Millətlər Təşkilatı (BMT) ilə əməkdaşlıq çərçivəsində Qəzzanın yenidən qurulması üçün Qahirədə beynəlxalq konfrans təşkil etmək niyyətində olduğu xatırladılıb.