BAKI, AzerVoice

“Əhali azalması Türkiyə üçün müharibədən daha böyük təhlükədir”.

AzerVoice xəbər verir ki,Türkiyə Prezidenti Rəcəb Tayyib Ərdoğan əhali azalmasının Türkiyə üçün ən ciddi təhdidlərdən biri olduğunu bildirib.

Atatürk Mədəniyyət Mərkəzində keçirilən KADEM-in 5-ci Adi Baş Assambleyasında çıxış edən Prezident Ərdoğan, əhali strukturundakı dəyişikliklərin gələcək üçün böyük təhlükə yaratdığını vurğulayıb. O qeyd edib ki, əhali azalması ölkənin gələcəyini təhdid edən əsas problemlərdəndir və bu, təkcə statistik bir məsələ deyil, milli təhlükəsizlik məsələsidir.

Prezident Qərb dəyərlərinin ailə institutu və demoqrafik sabitlik üzərindəki mənfi təsirlərini tənqid edib. O bildirib ki, sosial medianın xaotik mühiti, gender neytrallaşdırma siyasətləri və neoliberal həyat tərzi ailə dəyərlərini sarsıdır, gəncləri evlənməkdən və ailə qurmaqdan uzaqlaşdırır.

Ərdoğan həmçinin vurğulayıb ki, əhalinin azalması ilə mübarizə yalnız maddi təşviqlərlə deyil, həm də mədəni və mənəvi dəyərlərin yenidən dirçəldilməsi ilə mümkündür. Bu çərçivədə ailə institutunu qorumaq və gücləndirmək dövlətin prioritetlərindən biri olmalıdır.

Qeyd edək ki, son illərdə Türkiyədə doğum nisbətində ciddi azalma müşahidə olunur. Proqnozlara görə, mövcud tendensiya davam edərsə, yaxın 10 ildə əhali artımı dayanacaq, əsrin sonuna qədər isə əhali 10 milyon nəfər azala bilər.