Bakı, AzerVoice
Bakı şəhərində Azərbaycan və Pakistan arasında biznes əlaqələrinin inkişafına yönəlmiş forum keçirilib.
AzerVoice xəbər verir ki, tədbirdə iqtisadiyyat nazirinin müavini Səməd Bəşirli, Pakistan İslam Respublikasının federal ticarət naziri Cavad Pol və Pakistanın Azərbaycandakı səfiri Qasım Mohiuddinin çıxış ediblər.
Forum çərçivəsində B2B müzakirələri keçirilib.
Azərbaycanın İqtisadiyyat nazirinin müavini Səməd Bəşirli bildirib ki, Pakistanda Azərbaycan Ticarət Evinin və Birgə Ticarət və Sənaye Palatasının yaradılması imkanları araşdırılır.
Bəşirli qeyd edib ki, Azərbaycan və Pakistan arasında ticarət dövriyyəsi 2023-cü ildə 27 milyon ABŞ dollarına çatıb və bunun böyük hissəsini Pakistandan idxal təşkil edib, lakin qarşılıqlı ticarətin daha da inkişaf etdirilməsi üçün əhəmiyyətli potensial mövcuddur.
Onun sözlərinə görə, qeyri-neft sektorunda, xüsusilə nəqliyyat, turizm və əczaçılıq sahələrində böyük potensial var.
"Pakistanda Azərbaycan Ticarət Evinin və Birgə Ticarət və Sənaye Palatasının yaradılması imkanları da araşdırılır", - Bəşirli bildirib.
O əlavə edib ki, Azərbaycan ilə Pakistan arasında dərin dostluq, qardaşlıq və müttəfiqlik əsasında möhkəm və çoxşaxəli əlaqələr mövcuddur.
"Bu sıx əlaqələr əməkdaşlığımızı strateji tərəfdaşlıq səviyyəsinə qaldırıb. 2015-ci ildə imzalanmış "Azərbaycan Respublikasının və Pakistan İslam Respublikasının Strateji Tərəfdaşlıq Üzrə Birgə Bəyannaməsi" ölkələrimiz arasındakı münasibətlərin uzunmüddətli inkişafına əhəmiyyətli töhfə verib", - nazir müavini vurğulayıb.
Bu il iyulun 11-də Pakistanda Prezident İlham Əliyevin ölkəyə səfəri zamanı yüksək səviyyədə danışıqlar aparılıb.
Səfər zamanı iqtisadi, mədəni, elmi və texnoloji sahələri əhatə edən 15 saziş imzalanıb. Bu vacib səfərin nəticəsi olaraq, əməkdaşlığımızı tənzimləyən hüquqi baza 50-dən çox imzalanmış sənəd ilə genişlənib.
Pakistan şirkətləri Azərbaycanın iqtisadiyyatında getdikcə daha mühüm rol oynayır. "8 avqust tarixinə Azərbaycanda 3,706 Pakistan şirkəti qeydiyyatdan keçib, bunlardan 3,304-ü hazırda fəaliyyət göstərir. Səylərimiz çərçivəsində Azərbaycan ilə Pakistan arasında iqtisadi əməkdaşlıq daha da dərinləşəcək", - Bəşirli qeyd edib.
