BAKI,VOA, Orxan Qədirzadə

ABŞ və İran arasında gərginlik BMT-də keçirilən nüvə konfransı fonunda yenidən artıb.

VOA xəbər verir ki, Nyu-Yorkda keçirilən Nüvə Silahlarının Yayılmaması Müqaviləsinin icrasına dair 11-ci baxış konfransında İranın sədr müavinlərindən biri kimi seçilməsi Vaşinqtonun sərt reaksiyasına səbəb olub.

ABŞ rəsmiləri bu qərarı tənqid edərək bildiriblər ki, İranın belə bir vəzifəyə seçilməsi müqavilənin nüfuzuna zərbə vurur. ABŞ Dövlət Departamentinin nümayəndələri Tehranın beynəlxalq öhdəliklərə əməl etmədiyini və Beynəlxalq Atom Enerjisi Agentliyi ilə əməkdaşlıqdan yayınmaqda ittiham olunduğunu qeyd ediblər.

İran tərəfi isə ittihamları rədd edərək ABŞ-ın mövqeyini siyasi motivli adlandırıb. Tehran nümayəndələri vurğulayıblar ki, ABŞ-ın nüvə silahlarından istifadə etmiş yeganə ölkə olması onun bu məsələdə “hakim rolunda çıxış etməsini” qəbuledilməz edir.

Məlumata görə, konfransda müxtəlif ölkə qrupları tərəfindən ümumilikdə 34 sədr müavini namizədliyi irəli sürülüb və İran bu çərçivədə seçilib.

Nüvə məsələsi və siyasi qarşıdurma

Hazırkı vəziyyət ABŞ və İran arasında davam edən siyasi və hərbi gərginlik fonunda baş verir. Donald Tramp bir daha bəyan edib ki, İranın nüvə silahı əldə etməsinə imkan verilməyəcək.

Eyni zamanda İran uranın zənginləşdirilməsinin dinc məqsədlər üçün həyata keçirildiyini bildirir. Qərb ölkələri isə bu fəaliyyətin potensial olaraq hərbi məqsədlər üçün istifadə edilə biləcəyini iddia edir.

Məlumata görə, Tehran nüvə dosyesinin müzakirəsinin təxirə salınmasını və regiondakı gərginliyin azaldılması üçün alternativ diplomatik addımların atılmasını təklif edib. Bu çərçivədə Hörmüz boğazı ilə bağlı məsələlərin də müzakirəyə çıxarıldığı bildirilir.

Ekspertlər hesab edir ki, qarşıdakı günlər ABŞ və İran arasında danışıqların taleyi baxımından həlledici olacaq. Vasitəçilərin tərəflərə təzyiq göstərdiyi və kompromis üçün imkanların araşdırıldığı qeyd olunur.